Сафорати Иёлоти Муттаҳидаи Амрико аз баста шудани як қатор сомонаҳои шабакаи Интернет дар Тоҷикистон изҳори нигаронӣ намуд.
Дар изҳороти пахшшудаи сафорати ИМА дар Тоҷикистон дар ин робита зикр мегардад, ки баста шудани шабакаи Фейсбук, сомонаи Радиои Озодӣ ва дигар сомонаҳои хабарӣ аз ҷониби Хадамоти алоқаи назди Ҳукумати Тоҷикистон боиси нигаронии сафорати ИМА мебошад.
«Иёлоти Муттаҳида боварӣ дорад, ки ҳуқуқи ҳар як шаҳрванд дар озодона иброз намудани фикри худ, хоҳ дар майдони оммавӣ ва хоҳ дар шабакаи интернетӣ умумибашарист», – омадааст дар изҳорот.
Дар изҳорот аз ҳукумати Тоҷикистон даъват мешавад, ки ҳуқуқи озодона ибрози андеша намудани ҳар шаҳрвандро эҳтиром кунад ва маҳдудиятҳоро аз шабакаи Фейсбук, сомонаи Радиои Озодӣ ва дигар сомонаҳои хабарӣ бекор намояд.
