Субҳи рӯзи якшанбе бар асари садамаи нақлиёт дар пойтахт бародарони дугоник – Амир ва Темур Пешковҳо (Ғуломовҳо) ва дӯсти онҳо Ориён Ҷӯраев ба ҳалокат расиданд.
Тавре ба ОИ «Азия-Плюс» сардори маркази матбуоти Шуъбаи БДА-и Раёсати ВКД дар шаҳри Душанбе Шерафган Латифов хабар дод, ронандаи автомашинаи тамғаи «Лендровер», хатмкардаи аспирантураи Донишгоҳи давлатии Маскав, сокини 23-солаи пойтахт Назар Дериникян ҳангоми ҳаракат дар майдони Дӯстии хиёбони Рӯдакӣ аз уҳдаи идораи воситаи нақлиёт набаромада, бо суръати баланд ба бинои Почтаи марказии Душанбе (Главпочтамт) бармехӯрад.
«Бар асари бархӯрд таркиш ба вуқӯъ пайваста, дар ҷойи ҳодиса се нафар мусофирони «Лендровер» – Амир ва Темур Пешковҳои 24-сола ва ҳамсояву дӯсти онҳо Ориён Ҷӯраев ба ҳалокат расиданд», – гуфт вай.
Ба иттилои манбаъ, ронанда бо ҷароҳатҳои зиёди ҷисмонӣ ба бемористон мунтақил шуда, ин ҳодиса мавриди таҳқиқ қарор дорад.
