Хуҷанд. 20-уми октябр. ОИ «Азия-Плюс» – Ҷамъияти дорои масъулияти маҳдуди «Тамохуш»-и ноҳияи Исфара, ки дар таърихи 1-уми ноябр ҷашни 60-солагиашро таҷлил мекунад, ба ин муносибат қарзи коргаронро аз музди меҳнат ба маблағи 225 ҳазор сомонӣ пардохт карданист.
Тавре раиси кумитаи вилоятии иттифоқҳои касабаи саноати гидрометаллургӣ Саид Усмонов хабар дод, феълан дар ин корхона 350 нафар дар се баст машғули коранд. «Соли равон қарзи корхона аз музди меҳнат 70 ҳазор сомонӣ аст, боқимонда 150 ҳазор сомонӣ қарзи солҳои пешин аст», – гуфт ӯ.
Номбурда афзуд, ки баҳри таҷлили сазовори ҷашн ва саривақт пардохт намудани қарзҳои коргарон тамоми чораҳо андешида мешаванд.
Зикр гардид, ки айни замон корхона тибқи шартномаҳо бо ширкатҳои русиягии «Фербанент» ва «Алянс» кор мекунад.
