Рӯзи 6-уми феврал дар Ҳамоиши созмонҳои ҳомии ҳуқуқи минтақавӣ таҳти унвони «Ҳамраъйӣ, ҳамкории муштарак, дастгирӣ» дар Киев ҳомиёни ҳуқуқи минтақаи Осиёи Марказӣ аз истирдоди имконпазири собиқ нахуствазири ҷумҳурӣ Абдумалик Абдуллоҷонов ба Тоҷикистон изҳори нигаронӣ карданд.
Дар изҳороти муштараки санаи 7-уми феврал интишоршудаи ҳомиёни ҳуқуқи ОМ зикр мегардад, ки истирдоди Абдуллоҷонов ба Тоҷикистон, ки «низоми судии он як асбоби муҷозоти ҳукуматдорон барои сиёсатмадорону шаҳрвандони фаъоли мухолиф асту маҳбусон мавриди шиканҷаву азоб қарор мегиранд, ба ҷони ӯ хатар эҷод месозад».
Қобили таваҷҷуҳ аст, ки Абдуллоҷонов дар пойтахти Украина, ки раёсати САҲА-ро бар дӯш дорад, боздошт гардид. Намояндаи минтақавии Раёсати Комиссари олии СММ оид ба умури гурезагон дар Белорус, Молдова ва Украина Олдрих Андрисек дар посух ба саволи рӯзноманигорон дар ин робита изҳор дошт, ки ҳатто дар сурати дар мавриди ҷустуҷӯи Интерпол қарор доштан, шахс метавонад таъмини ҳифзи байнулмилалиро талаб намуда, мақоми гурезаро соҳиб шавад.
«Агар касе дар рӯйхати Интерпол пайдо шавад, ин ҳанӯз маънои онро надорад, ки ӯ гунаҳкор аст. Мутаассифона, дар рӯйхати Интерпол баъзан рақибони сиёсӣ низ пайдо мешаванд. Дар Оинномаи ин ташкилот дақиқан зикр шудааст, ки Интерпол наметавонад ба хотири даст ёфтан ба ҳадафҳои сиёсӣ истифода гардад», – иброз доштааст Андрисек.
«Истирдоди Абдуллоҷонов бархилофи нақзи муқаррароти Конвенсияи СММ зидди шиканҷа, Конвенсияи СММ оид ба мақоми гурезагон ва бо назардошти ҳадафҳои сиёсии таъқиби ӯ дар Тоҷикистон, метавонад ҳам ба нуфузи Украинаву ҳам дар маҷмӯъ САҲА, ки раёсаташро соли 2013 Украина ба ӯҳда дорад, латма ворид созад», – омадааст дар изҳорот.
Иштирокдорони Ҳамоиш аз ҳукуматдорони Украина даъват ба амал овардаанд, ки бо пуштибонӣ аз ҳуқуқи байнулмилалӣ, аз ҷумла ҳуқуқ ба озодӣ аз шиканҷа ва мурофиаи судии боадолат ба истирдоди Абдуллоҷонов ба Тоҷикистон роҳ надиҳанд.
Абдумалик Абдуллоҷонов яке аз шахсони маъруфи солҳои 90-и асри гузаштаи Тоҷикистон маҳсуб меёбад. Соли 1992 ӯ нахуствазири Тоҷикистон таъин шуда, дар ин мансаб то моҳи декабри соли 1993 фаъолият дошт. Ӯ ҳамчунин ба ҳайси сафири Тоҷикистон дар Русия низ ифои вазифа намудааст.
Пас аз шикаст дар маъракаи интихоботи президентӣ дар соли 1994 ӯ Тоҷикистон тарк намуда, дар кишварҳои Ғарб зиндагӣ мекард.
Ҳамчунин тибқи маълумоти мақомоти ҳифзи ҳуқуқи Тоҷикистон, Абдуллоҷонов дар маблағгузории ошӯби полковник Маҳмуд Худойбердиев низ гумонбар дониста мешавад, ки соли 1998 дар минтақаи шимоли ҷумҳурӣ фурӯ нишонда шуда буд. Солҳои ахир ӯ дар Лос-Анҷелеси ИМА ба сар мебурд.
Моҳи ноябри соли гузашта боз номи ӯ дар ВАО пайдо шуд. Мусоҳибаи ӯ дар бахши тоҷики сомонаи радиои Озодӣ ба табъ расид. Пайдо шудани Абдуллоҷонов дар сафҳаҳои матбуотро коршиносон ба маъракаи интихоботи президентии қарибулвуқӯъ дар Тоҷикистон рабт дода буданд.
