Дар бинои тавқифгоҳи муваққатии маркази маъмурии ВМКБ – шаҳри Хоруғ мурофиаи додгоҳии гумонбарон ба қатли генерал Абдулло Назаров оғоз гардид.
Ба даст доштан дар куштори генерал ду тан аз сокинони Хоруғ – Оқил Айёмбеков, бародари яке аз пешвоёни ғайрирасмии Бадахшон Толиб Айёмбеков ва ҳамсояву дӯсти ӯ аз маҳаллаи «Хлебзавод» Ҳамза Муродов гумонбар дониста мешаванд.
Тавре ба ОИ «Азия-Плюс» ҳимоятгари айбдоршаванагон Файзи Олӣ хабар дод, пушти дарҳои пӯшида баргузор шудани мурофиа барои таъмини бехатарии иштирокчиёни мурофиа сурат гирифта, зерҳимоягони ӯ дар содир намудани ҷиноят мутобиқи моддаи 104, қ. 2-и КҶ ҶТ (Одамкушӣ) айбдор карда мешаванд.
Ба қавли вай, мурофиаро судяи Суди олии ҶТ Мирзо Каримов раисӣ карда, ҷониби айбдоркунандаи давлатиро намояндаи Прокуратураи генералӣ ва ҷониби ҷабрдидаро писари генерали кушташуда Умед Назаров намояндагӣ мекунанд. «Ғайр аз ин, дар мурофиа 14 нафар шоҳидони он ҳодисаи фоҷеабор, аз ҷумла ҳамроҳони генерал – кормандони мақомоти амният ва дигар шоҳидон аз ҳисоби аҳолӣ ҳузур доранд», – иброз дошт ӯ.
Дар мурофиаи аввали судӣ муайян кардани ҳайати суд ва қироати хулосаи айбнома дар назар аст.
Ёдрас мекунем, ки генерал Назаров шоми 21-уми июли соли гузашта зимни бозгашт аз Ишкошим дар даромадгоҳи шаҳри Хоруғ мавриди ҳамлаи афроди номаълум қарор гирифта, кушта шуд. Автомашинаи ӯ аз ҷониби афроди номаълум боздошт шуда буд. Онҳо генералро аз автомашина берун ва бо корд якчанд зарба зада, аз ҷойи ҳодиса ғайб зада буданд.
Тибқи фарзияи тафтишот, ба куштори сардори Раёсати КДАМ дар ВМКБ як гурӯҳ шахсоне даст доранд, ки ба қочоқи маҳсулоти тамоку машғуланд.
То соли 2010 Абдулло Назаров ба ҳайси муовини раиси Кумитаи давлатии амнияти миллии Тоҷикистон ифои вазифа намуда, қаблан ба сифати сардори Раёсати КДАМ дар вилояти Суғд фаъолият дошт.
Пас аз куштори генерал Абдулло Назаров ҷиҳати боздошт ё нобуд кардани гунаҳкорони қатли генерал, дар Хоруғ амалиёти низомии сохторҳои қудратӣ роҳандозӣ шуда, тибқи маълумоти расмӣ, дар ҷараёни он 13 нафар кормандони сохторҳои қудратӣ ва 30 тан аз аъзои гурӯҳҳои мусаллаҳи ғайриқонунӣ ба ҳалокат расиданд.
