Сафири Тоҷикистон дар Русия Абдулмаҷид Достиев сафири тозатаъини Австралия дар Русия Пол Эндрю Майлер мулоқот анҷом дод.
Бино ба маълумоти хадамоти матбуоти сафоратхонаи Тоҷикистон дар Русия, дар рафти вохӯрӣ атрофи сиёсат, иқтисод ва робитаҳои ду кишвар табодули назар сурат гирифт. Зимнан, сатҳи хуби тамосу ҳамкории дуҷониба, ба вежа, миёни вазирони корҳои хориҷии ду кишвар, таъкид гардид.
Ба иттилои манбаъ,ҳамчунинр Абдулмаҷид Достиев ҳамтои лаосии худ – сафири Ҷумҳурии Халқӣ-Демократии Лаос дар Русия Тхиенг Буфаро бо хоҳиши ӯ ба ҳузур пазируфт. Ҳангоми мулоқот вазъи сиёсиву иқтисодӣ дар Тоҷикистону Лаос ва масъалаҳои ҳамкории дуҷониба баррасӣ гардиданд.
Сафири Лаос зимни суҳбат аз нишасти минтақавии вазирони корҳои хориҷии кишварҳои Осиёву Аврупо, ки қарор аст, 5-6 марти соли равон дар шаҳри Вйентиян баргузор гардад, ёдовар шуд ва ба иштироки фаъолонаи ҷониби Тоҷикистон дар он ҳамойиш изҳори умед кард.
