Пас аз бекор гардидани маҳдудият ба содироти картошка, Қазоқистон содирот ба хориҷаро якбора зиёд кард, ки яке аз самтҳои калидӣ Тоҷикистон ба ҳисоб меравад. Дар ин бора пойгоҳи иттилоотии “lsm.kz” хабар медиҳад.
Манбаъ менависад, ки дар моҳҳои январ-феврали соли 2026 аз Қазоқистон ба Тоҷикистон 16,7 ҳазор тонна картошка интиқол дода шудааст, ки нисбат ба як соли пеш (64,9 тонна) 257 баробар зиёд мебошад.
Ба иттилои ин сомона, дар ду моҳи соли 2026, ҳаҷми содироти картошка аз Қазоқистон ба Тоҷикистон 141 ҳазор тонна расида, дар муқоиса бо ҳамин давраи соли гузашта қариб 8 баробар зиёд шудааст. Харидори асосии ин навъи маҳсулот, Ӯзбекистон (124,6 ҳазор тонна) боқӣ монда, Тоҷикистон аз лиҳози ҳаҷми харид ба зинаи дуюм баромад.
“Аз рӯи натиҷаҳои соли 2025 Тоҷикистон ба маблағи умумии 13,1 млн доллар ҳудуди 77,5 ҳазор тонна картошка ворид кард. Ҳамин тариқ, танҳо дар зарфи 2 моҳи соли 2026 Қазоқистон, аллакай ҳудуди 21-22%-и ҳаҷми солонаи воридоти ин кишварро таъмин кард”, – навиштаанд муаллифони мавод.
Коршиносон афзоиши содиротро ба барқарор гардидани тиҷорат дар воридот ва талаботи баланд ба маҳсулоти Қазоқистон шарҳ медиҳанд. Ба таъкиди онҳо, агар чунин суръат боқӣ монад, Қазоқистон метавонад мавқеи худро миёни таҳвилгарони маҳсулот ба бозори картошкаи Тоҷикистон мустаҳкам кунад.
Дар ҳамин ҳол, дар бозори дохилии Қазоқистон поинравии нархи картошка оғоз шудааст. Моҳи март 1 кг картошка ба ҳисоби миёна 216 танга (4,37 сомонӣ тибқи қурби ҳозира) нарх дошт, ки 7,3% поинтар аз соли пешин аст, ҳарчанд аз оғози сол нархҳо ба андозаи 6,4% боло рафтанд.
Дар Тоҷикистон нархи картошка дар моҳи апрели соли 2026 дар муқоиса бо моҳи март 1,5% ва бо оғози сол 3,8% зиёд шудааст. Ҳоло 1 кг картошка дар бозорҳои кишвар бо нархи ҳудуди 5,5-7 сомонӣ фурӯхта мешавад.
