Дар се моҳи соли 2026-ум дар мақомоти андоз 11,5 ҳазор соҳибкори хурди нав ба қайд гирифта шуда, дар айни ҳол, 6,2 ҳазор тоҷири хурд фаъолияти худро қатъ кардаанд. Дар ин бора Оҷонсии омори Тоҷикистон хабар медиҳад.
Ба иттилои манбаъ, ҳоло дар кишвар то 349,7 ҳазор соҳибкори инфиродӣ фаъолият мекунанд, ки аз ин 40,5 ҳазор соҳибкор бо шаҳодатнома, 58,7 ҳазор бо патент, 68,1 ҳазор бо шаҳодатномаи махсус ва 182,4 ҳазор хоҷагии деҳқонӣ мебошад. Омори умумии соҳибкорон нисбат ба ҳамин давраи соли гузашта 14556 адад ё 4,3% зиёд шудааст.
Бо таносуби соҳикборон аз рӯи фоиз дар баргаи мо шинос шавед:
“Дар моҳҳои январ-марти соли 2026 дар маҷмуъ, 11470 соҳибкори инфиродии навтаъсис бақайд гирифта шудааст, ки аз ин, а 2044 соҳибкори инфиродӣ тибқи шаҳодатнома, 4150 соҳибкори инфиродии тибқи патент, 3862 соҳибкори инфиродӣ тибқи шаҳодатнома бо шартҳои махсус ва 1414 соҳибкори инфиродии хоҷагии деҳқонӣ мебошад”, – омадааст дар ҳисоботи Оҷонсии омор
Дар ҳамин ҳол, дар ин давра 6236 соҳибкори инфиродӣ барҳам дода шудааст, ки аз ин 1029 соҳибкор бо шаҳодатнома, 2184 соҳибкор бо патент, 2179 соҳибкор бо шаҳодатномаи махсус ва 844 хоҷагии деҳқонӣ мебошад.
Сабаби қатъ кардани фаъолияти онҳо маълум нест. Қаблан, худи соҳибкорон мегуфтанд, ки санҷишу ҳуҷҷатгузории зиёд боиси қатъи фаъолияташон мешавад. Вале мақомоти андоз мегуфт, аксари соҳибкорон қонунгузории андозро намедонанд ва ё аз як намуди фаъолияти соҳибкорӣ ба намуди дигар мегузаранд.
Бодя гуфт, ки рушди соҳибкории хурд дар кишвар дар сатҳи давлатӣ дастгирӣ мешавад. Дар Тоҷикистон қонунгузорӣ дар бораи ҳифз ва дастгирии соҳибкорӣ амал мекунад, ки дар он фароҳам сохтани шароити мусоид барои пешбурди тиҷорат, аз ҷумла имтиёзҳои андозӣ, барномаҳои давлатӣ ва дастгирии молиявӣ пешбинӣ шудааст. Аз ҷумла, давлат барномаҳои рушди соҳибкориро амалӣ сохта, тариқи грант ва фондҳои махсус ин самтро дастгирӣ мекунад.
Ғайр аз ин, дар кишвар барномаи давлатии дастгирии соҳибкорӣ барои солҳои 2023-2027 амал мекунад, ки ба рушди соҳибкорӣ ва беҳтар кардани шароити тиҷорат равона шудааст.
Дар ҳамин ҳол, бархе соҳибкорон аз монеаҳо зимни фаъолияташон нигаронӣ мекунанд.
