Нархи маҳсулоти истеъмолӣ (нархҳои истеъмолӣ) дар бозорҳои Тоҷикистон дар моҳи март 0,4% боло рафтааст. Аз ҷумла, маҳсулоти хӯрокворӣ 0,5%, ғайриозуқа 0,2% ва хидматрасониҳо 0,6% зиёд шудааст. Дар ин бора Оҷонсии омори Тоҷикистон хабар медиҳад.
Ба иттилои манбаъ, дар маҷмуъ, болоравии нархҳои истеъмолӣ аз оғози сол (январ-март) 1,2%-ро ташкил додааст. Маҳсулоти хӯрока 1,6% боло рафта, нархи маҳсулоти ғайриозуқа дар сатҳи аввали сол боқӣ мондааст ва арзиши хидматрасониҳои пулакӣ ба аҳолӣ 3,4% афзудааст.
“Арзиши маҳсулоти хӯрока дар моҳи марти соли ҷорӣ ба андозаи 0,5% боло рафтааст. Бештар аз меваҳо (ба ҳисоби миёна 5,8%), себ 19,7% ва аз сабзавот карам 4%, пиёз – 3,2% ва инчунин шакар ба андозаи 2,7% қиммат шудааст”, – гуфтааст Оҷонсии омор.
Дар ҳамин ҳол, биринҷ (ба андозаи 2,1%), сабзӣ (1,3%), тухм (1,1%), гӯшти гов (0,8%) ва гӯшти гӯсфанд (0,6%) арзон шудаааст.
Аз оғози сол аз ҳама бештар мева (12,1%), сабзавот (4,3%) равған ва чарбу (2,2%), орд ва нӯшокиҳои ғайрисиртӣ (1,5%) гарон шудаасат. Сабзӣ (4,1%), тухм (3,1%), биринҷ (6%) ва дигар маҳсулот ба миқдори начандон назаррас арзон шуданд.
Афзоиши нархҳо ба маҳсулоти асосии хӯрокворӣ
Нархҳо ба маҳсулоти ғайриозуқа дар моҳи марти соли 2026 ба андозаи 0,2% боло рафтанд. Сабаб ин гароншавии молҳои маишӣ (0,8%), масолеҳи сохтмон (0,6%), бензин (0,5%) ва сарулибосу пойафзол (0,1%) марбут мебошад.
Дар ҳамин ҳол, нархҳои маводи сӯзишворӣ ва равғанҳои молиданӣ (2,3%), гази моеъ (4,7%) ва сӯзишвории дизелӣ (0,4%) поин рафтааст.
Бояд гуфт, ки аз оғози сол, маҳсулоти ғайриозуқа асосан бар асари болоравии нарх ба гази моеъ (9,2%), мебел ва молҳои маишӣ (0,8%), инчунин сарулибосу пойафзол (0,3%) гарон шуданд. Аммо нархи бензин ва сӯзишвории дизелӣ мутаносибан ба андозаи 5,6% ва 9,5% поин рафтанд.
Хидматрасонии пулакӣ ба аҳолӣ дар моҳи марти соли равон ба андозаи 0,6% “асосан бар асари гароншавии хидматрасониҳои манзилию коммуналӣ (0,8%) ва хидматрасонии маишӣ (0,3%)” гарон шуданд.
Аз оғози сол нархҳо ба хидматрасонии пулакӣ ба андозаи 3,4% асосан дар натиҷаи гароншавии ҳамлу нақли ҳавоӣ (аз ҷумла билетҳои ҳавопаймоӣ бо хатсайри Душанбе – Маскав ба андозаи 2,1%) боло рафтааст.
