Душанбе. 15-уми октябр. ОИ «Азия-Плюс» – «Бӯҳрони молиявии ҷаҳонӣ ба фаъолияти Бонки давлатии амноатгузории «Амонатбонк» ва дар маҷмӯъ ба иқтисоди Тоҷикистон ҳеҷ таъсире нарасонид», – гуфт дар нишасти матбуотӣ раиси «Амонатбонк» Маҳмадамин Маҳмадаминов.
Кафолати асосии вазъи босуботи бозори дохилиро номбурда дар он мебинад, ки ниҳодҳои молиявии миллии ҷумҳурӣ бо низоми молиявии кишварҳои ғарб он қадр робитаҳои зиче надоранд.
«Мо аз Бонки ҷаҳонӣ, Бонки таҷдид ва рушди Аврупо, Бонки рушди Осиё ва дигар ниҳодҳои байнулмилалӣ, ки сохторҳои устувору боэътимод маҳсуб мешаванд, маблағҳо дастрас мекунем ва ба онҳо ин бӯҳрон ҳеҷ таъсире нарасонидааст», – идома дод ӯ.
Ба қавли раиси «Амонатбонк», бӯҳрони молиявии кунунӣ ба бонкҳое, ки қарзҳои хориҷӣ доранд, метавонад таъсири манфӣ бирасонад. Дар ҳамин ҳол ӯ таъкид сохт, ки «Амонатбонк» аз шарикони хориҷии худ қарзе надорад.
М.Маҳмадаминов афзуд, ки дар сурати коҳиш ёфтани воридшавии маблағҳо аз ҷониби мизоҷони хориҷӣ, ин омил метавонист ба бонк таъсири манфӣ бирасонад, вале «дар солҳои ахир шумори мизоҷони хориҷии мо афзуд».
