Душанбе. 8-уми октябр. ОИ «Азия-Плюс» – Дар Душанбе китоби доктори илмҳои фалсафа Абдулвоҳид Шамолов «Фалсафаи илоҳиёти Муҳаммади Ғаззолӣ» ба табъ расид.
Имрӯз он дар ҷараёни баргузории конфронси байнулмилалӣ дар мавзӯи «Ризоият ва гуфтугӯи тамаддунҳо: таърих ва замони муосир», ки ба муносибати 950-умин солгарди мутафаккир ва файласуфи бузурги форсу тоҷик Абӯҳамид Муҳаммади Ғаззолӣ доир мегардад, муаррифӣ карда шуд.
Дар кори конфронс намояндагони доираҳои илмии кишварҳои узви Иттиҳоди Давлатҳои Мустақил, Эрон ва Афғонистон ширкат варзида, дар бораи ҳаёту эҷодиёт ва осори Муҳаммади Ғазолӣ табодули афкор хоҳанд намуд. Имрӯз дар конфронс дабири кулли Маҷмаи ҷаҳонии баҳамойии мазҳабҳои исломӣ Оятулло Муҳаммад Алӣ Тасхирӣ маърӯза кард.
Қобили зикр аст, ки конфронс бо дастгирии мушовир оид ба фарҳанги сафорати Эрон дар Тоҷикистон созмон дода шудааст.
