Чанде қабл дар Мақомоти иҷроияи маҳаллии ҳокимияти давлатӣ дар шаҳри Душанбе таҳти раёсати раиси пойтахт Маҳмадсаид Убайдуллоев бо иштироки доираи васеи масъулини сохторҳо ва роҳбарони ташкилоту идораҳои шаҳрӣ ҷаласаи кории шаҳрдорӣ баргузор гардид, ки дар он натиҷаҳои ҷамъбасти фаъолият дар 6 моҳи соли равон баррасӣ шуданд.
Бино ба иттилои хадамоти матбуоти мақомоти шаҳрдории пойтахт, М.Убайдуллоев таваҷҷуҳи ҳизиринро пеш аз ҳама ба масоили фароҳам сохтани ҷойҳои нави корӣ, иҷрои нақшаи ҷамъоварии андоз, саривақт пардохт шудани нафақаву кӯмакпулиҳо, амалисозии босифати корҳои бунёду азнавсозӣ, таъмири асосӣ ва ҷории роҳҳои хиёбону кӯчаҳо ва баистифодадиҳии саривақтии онҳо, беҳдошти вазъи санитарию экологӣ ва ҳифзи саломатӣ, барориши саривақтии партовҳои сахти маишӣ, омодагиҳо ба соли нави хониш, ҷашни Истиқлолият ва мавсими зимистонгузаронии пешорӯ ва назорати истифодаи нерӯи барқ ва пардохти ҳаққи истифодаи он аз ҷониби муштариён ҷалб намуд.
«Раиси пойтахт бо хулоса аз фаъолияти анҷомдодаи сохторҳои шаҳрӣ дар амалисозии босифати корҳои бунёду азнавсозӣ, таъмири асосӣ ва ҷории роҳҳои хиёбону кӯчаҳо ва баистифодадиҳии саривақтии онҳо, бинобар сабаби зоҳир намудани бемасъулиятӣ дар иҷрои вазифаҳои хизматӣ ва ба таъхир андохтани муҳлати ба истифодадиҳии иншоотҳо дар кӯчаҳои Н.Қарабоев, Лоҳутӣ, Меҳнат ва Шарқ ба муовини худ Абдулҳақ Оев ва сардори Муассисаи давлатии “Раёсати сохтмон, азнавсозӣ ва таъмири асосию ҷории роҳҳою купрӯкҳои ҳудуди марзию маъмурии шаҳри Душанбе” Суҳроб Мирзоев муҷозоти интизомӣ – танбеҳ эълон намуд», – зикр мегардад дар иттилои шаҳрдорӣ.
Зимнан зикр мегардад, ки раиси пойтахт мақомоти прокуратураро муваззаф сохтааст, ки дар мавриди роҳ додан ба изофанависӣ ҷиҳати фароҳам сохтани ҷойҳои корӣ фаъолияти субъектҳои хоҷагидориро мавриди санҷиш қарор диҳад.
