Ахири ҳафтаи сипаришуда машварати кории Ташкилоти ҷамъиятии ҷавонони ҲХДТ “Созандагони Ватан” бо волонтёрҳо доир гардид.
Бино ба иттилои сомонаи расмии ҲХДТ, дар машварат раиси ташкилоти мазкур Адҳам Мирсаидов ба волонтёрҳо вобаста ба пеш омадани маъракаи муҳими сиёсӣ – интихоботи президенти Тоҷикистон ва моҳияти он сухан карда, ҳамчунин ҷиҳати ба роҳ мондани ҳамкории ногусастанӣ бо Ҳизби Халқии Демократии Тоҷикистон дар ин марҳила вазифаҳои волонтёрони “Созандагони Ватан”-ро мушаххас кард.
Зикр шуд, ки бинобар ҷиноҳи ҲХДТ будани ТҶҶ “Созандагони Ватан” ҳар як узв ва ҷонибдори ин ниҳод бояд дар маъракаи интихоботӣ ҳамеша дастёр ва кӯмакрасони ҲХДТ бошанд.
Ташкилоти ҷамъиятии ҷавонони «Созандагони Ватан»-и ҲХДТ моҳи апрели соли 2011 таъсис дода шуда, моҳи ноябр дар Вазорати адлия сабти ном шуд. Айни замон шумори аъзои ташкилот ҳудуди 25 ҳазор нафар ҷавононро ташкил медиҳад. Ғайр аз ин, ҳудуди 60 ҳазор нафар аъзои ҷавони ҲХДТ низ ба сафҳои ташкилоти «Созандагони Ватан» шомил шуданд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 230 ҳазор нафарро ташкил медиҳад. Ҳудуди 40 дарсади аъзои ҳизб ҷавонон мебошанд. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
