Субҳи имрӯз сардори Ситоди кулли Қувваҳои Мусаллаҳ, муовини аввали вазири мудофиаи Тоҷикистон генерал-лейтенант Рамил Нодиров ба Маскав раҳсипор шуд.
Тавре ба ОИ «Азия-Плюс» сардори маркази матбуоти Вазорати мудофиаи ҷумҳурӣ Фаридун Маҳмадалиев хабар дод, дар шаҳри Маскав муовини аввали вазири мудофиа дар кори ҷаласаи навбатии Шӯрои вазирони мудофиаи кишварҳои узви ИДМ (21-уми ноябр) ширкат меварзад.
Ба гуфтаи ӯ, дар ҷаласа баррасии беш аз 20 масоили марбут ба ҳамкориҳои низомии вазоратҳои мудофиаи кишварҳои узви Иттиҳод дар назар аст.
«Дар ҷаласа аз ҷумла, атрофи баргузории санҷиши ташкили истифодаи воситаҳои низоми ошкорсозии давлатӣ дар қувваҳои мусаллаҳи кишварҳо, тартиби ҷамъоварӣ ва табодули маълумот дар бораи ноқисиҳои техникаи авиатсионӣ, ҳамкорӣ дар масоили таҷдид ва таъмири воситаҳои таҷҳизоти муҳандисӣ, таъмини онҳо бо қисмҳои эҳтиётӣ, таъсиси Низоми муттаҳидаи назорат ва арзёбии вазъи радиатсионӣ, кимиёвӣ ва биологӣ дар вазоратҳои мудофиа, таъмини гидрометереологии чорабиниҳои муштараки омодагии фаврӣ ва ҷангӣ ва ғайра табодули назар сурат хоҳад гирифт», – гуфт Ф.Маҳмадалиев.
Ёдрас мекунем, ки имрӯз президенти Тоҷикистон Эмомалӣ Раҳмон бо фармони худ вазири мудофиаи ҷумҳурӣ Шералӣ Хайруллоевро аз мансаб сабукдӯш намуд. Шералӣ Хайруллоев аз соли 1995 ин мансабро ишғол мекард. Санаи 8-уми ноябри соли равон ӯ 64-сола шуд.
