Раҳматулло Мардиктоев, як хонандаи мактаб дар пойтахт, ҷони як духтарро, ки бо қасди худкушӣ худро ба рӯди Душанбе андохт, наҷот додааст. Ӯ мегӯяд, барои тамрин ба соҳили рӯд рафта буд ва вақте дар об ғарқ шудани духтареро дид, ба қасди наҷоти ӯ худро ба рӯд андохт. Ӯ духтарро аз об берун карда, ба шифохона бурд.
Дар бораи қаҳрамонии Раматулло бори аввал пулиси Душанбехабар дод. Ин ниҳод рӯзи 20-уми апрел дар саҳифаи телеграми худ навишт, шаби 19-уми апрел тахминан соати 21:00, дар кӯчаи Соҳилӣ, дар зери пули наздикии бозори собиқ “Султони Кабир” як ҷавондухтар бо қасди худкушӣ худро ба рӯд партофт ва аз сӯйи Раҳматулло Мардиктоев наҷот дода шуд.
“Бо талоши ӯ ҷавондухтар аз об бароварда шуда, ба Муассисаи давлатии “Беморхонаи Истиқлол” интиқол дода шуд”, – навишт пулиси Душанбе.
Ин ниҳод сабаби қасди ҷон кардани духтарро “муноқишаи оилавӣ” арзёбӣ карда, гуфт, “ҳоло ӯ таҳти назорати табибон қарор дорад”.
Пулиси Душанбе аз Раҳматулло “барои иҷрои қарзи шаҳрвандӣ ва наҷоти ҷавондухтар аз сӯиқасди худкушӣ” миннатдорӣ кард.
“Вақте худро ба рӯд андохтам, аз чизе тарс надоштам”
Мо РаҳматуллоМардиктоевро пайдо кардем ва бо иҷозаи модараш, бо ӯ дар бораи ҷузъиёти ҳодиса суҳбати кӯтоҳе доштем.
Ӯ нақл кард, ки шаби 19-уми апрел, тахминан соати 21:00, дар шафати рӯди Душанбе, воқеъ дар кӯчаи Соҳилӣ ,тамрин мекард ва бо қасди нӯшидани об ба соҳили рӯд рафт ва дид, ки духтаре дар об ғарқ мешавад.
“Дидам, ки об чизеро бо худ мебурд. Омад-омаду дар оҳанпора дармонд. Ба об паридаму дидам, ки духтар аст. Аз об берун баровардам, ба ёрии таъҷилӣ занг задам, аммо дарк кардам, ки онҳо дер мерасанд. Аз ин лиҳоз, кирокашеро доштаму духтарро ба шифохонаи “Истиқлол” расонидам. То омадани хонаводаи ин духтар онҷо истодам. Хонаводааш омаданд, ташаккур гуфтанд ва рақами телефонамро хостанд. Гуфтам, ки ҳадафи ман наҷоти ҷони инсон буду халос”, – нақл кард Раҳматулло.
Раҳматулло мегӯяд, вақте худро ба рӯд андохт, аз чизе тарс надошт, зеро мехост ҷони инсонеро наҷот диҳад.
Пас аз ин ҳодиса, ба қавли Раматулло, пулиси Душанбе ба ӯ ташаккур гуфта, иброз дошт, ки барояш кумак мекунад.
Модари Раҳматулло гуфт, ки писарашро танҳо тарбия кардаву ба воя расонидааст ва ифтихор дорад, ки Раҳматулло ҷасуру соҳибирода шудааст.
Худи Раҳматулло мегӯяд, пас аз дарс ва дар вақти холиаш дар нуқтаи таъмири мошин кор мекунад ва дар пешбурди зиндагӣ ба модараш ёрӣ мерасонад.
“Ҳамчунин, вақт меёбам ва дар маркази забономӯзӣ забони хориҷӣ меомӯзам. Дар оянда мехоҳам тарҷумон шавам”, – гуфт Раҳматулло.
Бояд гуфт, ки наҷоти ҷавондухтар аз сӯйи як хонандаи мактаб дар ҷомеа ва махсусан, дар шабакаҳои иҷтимоӣ густарда баррасӣ мешавад ва одамон рафтори Раҳматуллоро “намунаи ибрат барои наврасону кӯдакон” меҳисобанд. Ҳамчунин, аксар корбарони шабакаҳои иҷтимоӣ таъкид мекунанд, ки тарғиби қаҳрамонии наврасону ҷавононе мисли Раҳматулло кирдорҳои ғайриқонунӣ миёни ҷавононро коҳиш медиҳад.
Ёдовар мешавем, ки тибқи иттилои Кумитаи ҳолатҳои фавқулода ва мудофиаи шаҳрвандии кишвар, соли гузашта дар кӯлу рӯдҳои Тоҷикистон 180 нафар ғарқ шудаанд, ки нисбат ба ҳамин давраи соли 2024 як нафар зиёд аст. Аз теъдоди умумии ғарқшудагон 32 зан ва 148 мард будаанд.
