Қазоқистон ният дорад, ки содироти зироати ғалладона ва маҳсулоти хӯрокворӣ ба Тоҷикистонро густариш диҳад. Ин нукта дар вохурии Нурмаҳмад Аҳмадзода, директори Оҷонсии захираҳои давлатии моддии Тоҷикистон бо Элдар Исмагулов, муовини раиси раёсати ширкати “Продкорпоратсия”-и Қазоқистон зикр шудааст.
Тавре сомонаи “inbusiness.kz” хабар медиҳад, ин масъала дар Остона баррасӣ шуда, Нурмаҳмад Аҳмадзода иттилоъ додааст, ки ният доранд, аз ин кишвар ба Тоҷикистон то 1,3 млн тонна зироати ғалла ворид кунанд. Ӯ гуфтааст, Душанбе на танҳо ба харидории ғалла, балки орду равғани офтобпараст низ ҳавасманд аст.
Дар вохӯрӣ, зикр шудааст, ки Қазоқистон ба таври анъанавӣ содиркунандаи калидии гандум ва орд ба Тоҷикистон боқӣ мемонад.
“Ҳаҷми истеҳсолоти дохилӣ дар ҷумҳурӣ ҳамагӣ 40%-и талаботро қонеъ сохта, аз ин рӯ, воридот нақши муҳим дорад. Дар соли 2025 воридоти гандум аз Қазоқистон ба сатҳи рекордӣ дар тайи панҷ сои ахир – 1,2 млн тонна расид”, – зикр шудааст дар вохӯрӣ.
Элдар Исмагулов гуфтааст, “шарикии мо бо гузаштаи вақт санҷида шуда, ба эътимоди мутақобила ва дарки вазифаҳои умумӣ асос ёфтааст. Аз ҷониби худ, мо ба пешниҳоди механизмҳои боэътимоди содирот, кафолати ҳаҷмҳои устувори ғалладона ва маводи ғизоии зарурӣ ба Тоҷикистон омодаем”.
Ҷониби Тоҷикистон намояндагони ин ширкатро ҷиҳати ошноӣ бо зерсохтори захираи ғалладона ва баррасии имкони иштирок дар лоиҳаҳои сохтмони иншооту иқтидорҳои коркард, ба Душанбе даъват кардааст.
Ширкати қазоқистонӣ таъкид доштааст, ки метавонад “интиқоли устувор”-и ғалладонаро таъмин ва механизмҳои боэътимоди ҳамкории мутақобиларо пешниҳод созад.
Зери мафҳуми “интиқоли устувор” шартҳое дар назар дошта шудаанд, ки ба тағйири ҳаҷм ва муҳлатҳои интиқол вобаста ба талаботи харидор марбутанд. Содиркунанда метавонад тезтар ба талаби харидор вокуниш нишон дода, зимни зарурат ҳаҷми интиқолро кам ё зиёд кунад ва вобаста ба вазъият дар бозор онро мутобиқ кунад.
