Бо назардошти сардии обу ҳаво, ҳифзи саломатии таълимгирандагон имрӯз фармоиши вазири маориф ва илми Ҷумҳурии Тоҷикистон Нуриддин Саидов «Дар бораи эълон намудани таътил дар муассисаҳои таълимӣ» ба имзо расид.
Бино ба иттилои хадамоти матбуоти Вазорати маорифи ҶТ, тибқи фармоиши мазкур дар муассисаҳои таълимии ҷумҳурӣ новобаста аз шакли ташкилию ҳуқуқӣ (муассисаҳои таҳсилоти томактабӣ, миёнаи умумӣ, ибтидоӣ, миёна ва олии касбӣ) аз 3 то 10 феврали соли ҷорӣ таътил эълон карда шуд.
Гуфта мешавад, шуруъ аз 10.02.2014 дар тамоми муассисахои таълимӣ дарс тибқи ҷадвали дарсӣ бояд ба роҳ монда шавад. Соатҳои дарсии дар давоми таътил иҷронашуда тибқи ҷадвали алоҳидаи тасдиқгардидаи дарси идовагӣ дар нимсолаи дуюми таҳсили 2014 гузаронида мешаванд.
Ҳамзамон, фармоиши мазкур раёсатҳои маорифи ВМКБ, вилоятҳои Суғду Хатлон, шаҳри Душанбе, шуъбаҳои маорифи шаҳру ноҳияҳо, директор ва ректорони муассисаҳои таълимиро вазифадор менамояд, ки аз натиҷаи иҷрои фармоиши мазкур ба Вазорати маориф ва илми Ҷумҳурии Тоҷикистон маълумоти хаттӣ пешниҳод намоянд.
