Дирӯз, 27-уми апрел, раиси як хоҷагии деҳқонӣ дар ҷамоати Хистеварзи ноҳияи Бобоҷон Ғафуров ду ҳамдеҳаашро бо милтиқи шикорӣ захмӣ кардааст. Ҳардуи онҳо ҷон бохтаанд.
Имрӯз, 28-уми апрел, Абдуқаҳҳор Абдуҷалилов, муовини раиси ҷамоати Хистерварз дар суҳбати телефонӣ ба “Азия-Плюс” ҳодисаро тасдиқ кард.
Ба иттилои ӯ, Хуршед Мавлонови 46-сола, раиси хоҷагии деҳқонии Зоидбой Каримови деҳаи Хистеварз ба куштори ду сокини ин деҳа – Наимҷон Ҳоҷибоеви 47-сола ва Шариф Султонови 41-сола гумонбар аст.
Мовини раиси ҷамоати Хистерварз гуфт, ки рӯзи гузашта Хуршед Мавлонов бо милтиқи шикорӣ ду ҳамдеҳаашро захмӣ кардааст, ки бар асари он ҷабрдидагон ба ҳалокат расидаанд.
Дар аксҳои ҷойи ҳодиса, ки дастраси “Азия-Плюс” шуд, дида мешавад, ки яке аз тахтапушт ва дигарӣ аз пушти гардан ва биниаш хунрезӣ дорад. Маълум нест, ки онҳо дар кадом шароит ҷон бохтаанд ва оё ҳарду аз тири милтиқ кушта шудаанд.
Абдуҷалилов сабабу омили ҳодисаро дақиқан шарҳ надод, танҳо кӯтоҳ гуфт, ки “сабаб асосан маблағ аст”. Гап сари кадом маблағ меравад ва миёни фавтидагону гумонбар чӣ додугирифт сурат гирифтааст, дақиқ нест.
Хуршед Мавлонов солҳо милтиқи шикорӣ доштааст ва сокинон аз ин огоҳ будаанд.
Наимҷон Ҳоҷибоев ва Шариф Султоновро субҳи имрӯз дар зодгоҳашон ба хок супоридаанд. Хуршед Мавлонов боздошт шудааст.
Аз Раёсати ВКД дар вилояти Суғд рух додани ҳодисаи куштор дар ҷамоати Хистеварзро ба мо тасдиқ, аммо ба далели “халалдор накардани ҷараёни тафтишот” аз ифшои ҷузъиёти ҳодиса худдорӣ карданд.
Назари пайвандони гумонбар ва кушташудагон ҳам ба мо дастрас нест.
Ёдовар мешавем, ки давоми моҳи апрел ин дуюмин куштори пурсарусадо дар вилояти Суғд аст. Рӯзи 8-уми апрелкорманди ҶДММ “Кабири Хуҷанд” Алишер Ҷӯраеви 30-сола, сокини ҷамоати шаҳраки Палоси шаҳри Бӯстон (Чкаловски пешин) ҳамкораш Иқбол Носирови 40-сола, сокини ҷамоати деҳоти Ғозиёни ноҳияи Бобоҷон Ғафуровро бо зарби корд ба ҳалокат расонида буд.
