Соли 2013 тариқи тамоми навъҳои воситаҳои нақлиёт дар Тоҷикистон беш аз 72 млн. тонна бору маҳсулот ҳамлу нақл шуд, ки нисбат ба нишондиҳандаи соли 2012 ба андозаи 6,2% бештар аст.
Бино ба маълумоти Вазорати наклиёти ҶТ, соли 2013 тавассути воситаҳои нақлиёти истифодаи умумӣ зиёда аз 18 млн. тонна бор кашонида шудааст, ки нисбат ба соли пешин 1,3% зиёдтар мебошад.
Дар Вазорат зикр карданд, ки соли гузашта 561 млн. нафар мусофирон аз хизматгузориҳои воситаҳои нақлиёт истифода кардаанд. Аз шумори умумии мусофирон 1,1 млн. нафарашон аз нақлиёти ҳавоӣ ва қариб 561 ҳазор нафарашон аз нақлиёти роҳи оҳан истифода кардаанд.
Зимнан таъкид шуд, ки соли гузашта аз ҷониби 39 давлати хориҷи дуру наздик ва ширкатҳои ватанӣ тариқи нақлиёти байнулмилалии автомобилӣ 1,9 млн. тонна бор кашонида шудааст, ки нисбат ба соли 2012 ба миқдори 10,6% бештар аст. Ҳиссаи боркашонони ватанӣ дар ҳамлу нақли байнулмилалӣ 48,5%-ро ташкил додааст.
