Вазорати корҳои дохилии Тоҷикистон дар бораи ҳалокати сокини деҳаи Чорқишлоқи шаҳри Исфара Масрур Иброҳимов ҳангоми амалиёти ҷангӣ бар зидди нерӯҳои ҳукумати Башор Асад хабар дод.
Гузориши телевизионӣ дар ин бора дар барномаи «Сипар»-и Шабакаи аввали телевизиони Тоҷикистон намоиш дода шуд, ки ин барнома аз ҷониби ВКД ҶТ таҳия гардида буд.
Дар барнома зикр гардид, ки моҳи декабри соли 2013 Иброҳимов муҳоҷирати корӣ ба Русияро ихтиёр намуда, аммо баъдтар бо даъвати хоҳараш Макнуна Иброҳимова, ки бо шаҳрванди араб оила барпо кардаву дар Сурия иқомат дошт, ба ин кишвар раҳсипор мегардад. Зикр гардид, ки Масрур Иброҳимов чанде алайҳи ҳукумати Башор Асад ҷангида, санаи 22-юми март ҳангоми муҳорибаҳо ба ҳалокат расидааст.
Ҳамчунин бино ба маълумоти ВКД ҶТ, зимни баргузории чораҳои тафтишотӣ ошкор шудааст, ки дар деҳаи Чорқишлоқи шаҳри Исфара боз як шахсе иқомат доштааст, ки муқобили ҳукумати расмии Сурия меҷангад ва ин шахс Ислом Ҳакимови 28-сола мебошад.
Дар барнома қайд шуд, ки бародаронаш Нуриддин ва Қаюм Ҳакимовҳо барои ба Сурия рафтани оилаи ӯ кумак кардаанд. Қаюм Ҳакимов дар барнома иқрор мешавад, ки ҳамсар ва фарзандони бародараш низ аввал ба Русия, сипас ба Туркия ва аз он ҷо ба Сурия рафтаанд. Ӯ ҳамчунин изҳор намуд, ки пеш аз сафар бародари хурдии онҳо эътироф кардааст, ки ба ҷанг муқобили ҳукумати расмии Сурия меравад.
Ёдрас мекунем, ки ин ҳодисаи аввали ҳалокати шаҳрванди Тоҷикистон дар ҷанги Сурия нест. Қаблан рӯзи 22-юми март дар торнамои Akhbar Sham дар бораи ҷиҳоди Абӯ Аҳмади Тоҷикӣ хабар дода шуд. Баъдтар маълум шуд, ки ӯ сокини 26-солаи шаҳри Кӯлоб Бахтиёр Шеров аст. Хадамоти махсуси Тоҷикистон низ соли гузашта дар бораи ҳалокати се шаҳрванди Тоҷикистон дар ҷангҳои Сурия хабар дода буданд.
