Дар вилояти Суғд аз оғози соли равон 70 корхонаи нави саноатии хурду миёна ва бузург бо фарогирии 1 ҳазору 541 ҷойҳои нави корӣ ба фаъолият пардохтанд. Дар ин бора ба «Азия-Плюс» аз шуъбаи энергетика ва саноати ҳукумати вилояти Суғд хабар доданд.
Ба иттилои манбаъ, айни замон дар қаламрави минтақаи шимоли ҷумҳурӣ 335 корхонаҳои саноатӣ фаъолият доранд. «Дар зарфи 6 моҳи соли ҷорӣ дар корхонаҳои саноатии вилояти Суғд ба маблағи 1,6 млрд. сомонӣ маҳслуот истеҳсол шуд, ки нисбат ба нишондиҳандаи ҳамин давраи соли гузашта 24% зиёдтар аст», – гуфт манбаъ.
Ҳамчунин зикр гардид, ки то ахири сол дар қаламрави минтақаи шимоли кишвар 160 корхонаи нави саноатӣ мавриди истифода мегиранд, ки ба то 5 ҳазор зиёд кардани ҷойҳои нави корӣ имкон фароҳам меоварад.
