Бар асари таркиши зарфи дорои хлориди аммиак дар коргоҳи металлургии деаи Арбобхотуни ноҳияи Рӯдакӣ 40 нафар кӯдакони дар наздикии коргоҳ иқоматдошта заҳролуд шуданд.
Аз Кумитаи ҳолатҳои фавқулода ва мудорфиаи граждании назди ҳукумати ҶТ ба «Азия-Плюс» дар ин робита иттилоъ доданд, ки ин ҳодиса шоми рӯзи панҷшанбе, тахминан соати 21-00 ба вуқӯъ пайвастааст.
Ба иттилои манбаъ, ҳамаи кӯдакони заҳролудшуда дар Маркази миллии тиббӣ (Қарияи Боло) ва беморхонаи маҳаллаи Советский-1-и Душанбе бистарӣ шудаанд. «Ба гуфтаи табибон, вазъи солимии кӯдакон хуб буда, онҳо мавриди муолиҷа қарор доранд», – гуфт ӯ.
Зимнан зикр гардид, ки дар ҷойи ҳодиса барои муайян кардани сабаби рух додани таркиш кормандони милиса, Кумитаи ҳолатҳои фавқулода ва хадамоти ҳифзи муҳити зист машғули коранд.
