Чандест, ки дар шаҳри Хуҷанд ва берун аз он маҳсулоти гӯштии ширкати «Файзи Расул» байни харидорон маҳбубият пайдо намудааст.
Бино ба иттилои хадамоти матбуоти раиси шаҳри Хуҷанд, ҳоло коргоҳ ният дорад бахшида ҷашни 20 солагии қабули сарқонуни кишвар ҳаҷми истеҳсоли худро зиёд намуда, барои харидорон намудҳои нави маҳсулоти хешро пешкаш созад. Бо ин мақсад коргоҳ таҷҳизоти нави коркард ва истеҳсоли маҳсулоти гӯштиро харидорӣ намуда, корҳои васлу танзимро ба анҷом мерасонад.
Ба иттилои манбаъ, раиси шаҳри Хуҷанд Раҷаббой Аҳмадзода бо фаъолияти коргоҳи мазкур аз наздик ошно гардида, бо корҳои васлу танзими хатти нави истеҳсоли маҳсулоти гӯштӣ ошно гардид.
Роҳбарияту мутахаасисони ширкати номбурда ба Раиси шаҳри Хуҷанд доири таҷҳизоти нав ва иқтидору имконияти он маълумот дода зикр намуданд, ки ҳоло коргоҳ 28 намуди маҳсулоти гӯштиро ба харидорон пешкаш намуда, айни замон омодаи ба кор даровардани боз як хатти нави истеҳсоли ҳасибчаҳо тибқи стандартҳои аврупоӣ ҳастанд. Дар натиҷа номгӯи маҳсулоти ҳасибии ширкат ба 32 номгӯй расонда шуда, дар ин замина имконияти ташкили ҷойҳои нави корӣ пайдо хоҳад шуд.
Ба фаъолият шурӯъ намудани хатти нави технологӣ имкон медиҳад,ки бозори дохилии вилояти Суғд ва кишвар аз маҳсулоти босифати ватанӣ таъмин гардад. То имрӯз ин намуди маҳсулот аз хориҷи кишвар,-Ҷумҳурии Исломии Эрон ва Канада ворид мегардид. Таҷҳизоти муосир аз Ҷумҳурии Белорус, Федератсияи Россия ва Олмон оварда шуда, сифати онҳо ҷавобгӯи талаботу меъёрҳои байналмиллалӣ аст.
Лозим ба ёдоварист,ки ҳоло дар коргоҳи мазкур наздик 50 нафар бо ҷойи корӣ таъмин буда, иқтидори истеҳсолии коргоҳ ба коркарди то 800 кг гӯштро ташкил медиҳад.
