Аз 10 то 21 ноябри соли ҷорӣ дар Маркази таълимии Агентии назорати маводи нашъаовари назди Президенти Ҷумҳурии Тоҷикистон тренинг барои 20 нафар кормандони Дастгоҳи марказӣ ва Раёсатҳои минтақавӣ дар мавзӯи “Такмил додани муқовимати оперативӣ-ҷустуҷӯӣ барои бастани роҳҳои қочоқи маводи нашъаовар ба воситаи Хатсайри Шимолӣ” оғоз шуд.
Бино ба иттилои шуъбаи робита бо ҷомеаи Агентӣ, тренинги мазкур дар доираи Лоиҳаи Шӯрои НАТО-Россия оид ба омӯзиши кормандони мақомоти ҳифзи ҳуқуқи кишварҳои Осиёи Марказӣ, Афғонистон ва Покистон дар самти мубориза бо муомилоти ғайриқонунии маводи мухаддир мегузарад ва аз ҷониби Намояндагии минтақавии Раёсати СММ оид ба маводи нашъаовар ва ҷинояткорӣ дар Осиёи Марказӣ амалӣ мешавад.
Дар доираи тренинг кормандони Агентӣ дар мавзӯъҳои баргузории чорабиниҳои гуногуни тактикӣ ва оперативӣ дар мубориза бо муомилоти ғайриқонунии маводи нашъовар омӯзиш мегиранд, ҳамчунин масъалаҳои ҳамкориҳоро дар баргузории чорабиниҳои муштарак таҷриба мекунанд.
Тренинг аз ҷониби муаллимони Донишгоҳи ҳуқуқшиносии Сибири Федератсияи Россия гузаронида мешавад.
