Раиси Кумитаи иҷроия – котиби иҷроияи Иттиҳоди Давлатҳои Мустақил Сергей Лебедев, ки роҳбари нозирони ИДМ дар интихоботи вакилони Маҷлиси намояндагони Маҷлиси Олии Ҷумҳурии Тоҷикистон аст, бо раиси КМИР Тоҷикистон Шермуҳаммади Шоҳиён мулоқот карда, дар он масъалаҳои омодагӣ ва баргузор намудани интихоботи парлумонии ба санаи 1 март таъиншуда мавриди баррасӣ қарор гирифтанд.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки зимни вохӯрӣ С.Лебедев изҳор доштааст, ки КМИР барои дар сатҳи зарурӣ баргузор кардани интихобот корҳои қобили мулоҳизаро ба анҷом расонидааст.
«С.Лебедев зикр кард, ки ба ҷуз намояндагони Украина, дар интихоботи қариблувуқӯъи парлумонии Тоҷикистон 204 нафар нозирони кишварҳои узви ИДМ иштирок мекунанд ва нозирони ИДМ аз тамоми минтақаҳои Тоҷикистон боздид намуда, омодагиии хуб ба ин маъракаи муҳимро зикр карданд», – гут Додозода.
Зимнан зикр гардид, ки роҳбари нозирони ИДМ дар маъракаи интихоботи парлумонии Тоҷикистон рӯзи 2 март аз натиҷаи арзёбии интихобот аз ҷониби ҳайати ИДМ маълумот хоҳад дод.
