Ду намояндаи Ҳизби коммунисти Тоҷикистон (ҲКТ) дар интихоботи парлумонӣ аз ҳавзаҳои якмандатии интихоботӣ пирӯзӣ ба даст оварданд.
Роҳбари дастгоҳи КМИР Тоҷикистон Абдуманнон Додозода ба «Азия-Плюс» дар ин робита иттилоъ дод, ки аъзои ҲКТ Иброҳим Абдуллозода ва Ҷаббор Аҳмедов дар ҳавзаҳои якмандатии интихоботии шаҳри Истаравшан ва ноҳияи Бобоҷон Ғафурови вилояти Суғд ғолиб дониста шуданд.
Дар ҳамин ҳол, раиси ҲКТ Шодӣ Шабдолов мегӯяд, Ҷаббор Аҳмедов ахири соли гузашта барои дағалона вайрон кардани оинномаи ҳизб аз сафҳои коммунистон хориҷ шуда буд.
Он замон Ҳизби коммунист Аҳмедовро ба худсарона азхудкунии мансаби роҳбари коммунистон дар Суғд айбдор карда буд.
«Собиқ раиси шаҳри Истаравшан Иброҳим Абудллозода дар кори ҲКТ иштирок намекунад ва ман ӯро комуннисти қалбакӣ ном мебарам», – таъкид дошт Шабдолов.
