Сумайя Раҳматова, духтари 14-солаи тоҷик, ки ҳамроҳи модар ва се бародараш дар пойтахти Миср иқомат дошт, бар асари шиканҷа ва таҷовуз ба номус ба ҳалокат расид.
Сардори департаменти иттилооти ВКХ Тоҷикистон Абдулфайз Атоев ба «Азия-Плюс» дар ин робита иттилоъ дод, ки зодаи Душанбе Сумайя Раҳматова рӯзи 28 март барои харидории шириниҳо аз мағозаи назди манзили зисташон аз модараш иҷозат пурсида, аммо ба гуфтаи модараш, агар ӯ ҳамеша баъди гузашти 10-15 дақиқа аз мағоза бармегаштааст, ин дафъа аз он ҷо баъди 2 соат баргаштааст.
«Тамоми сарулибоси ӯ ба хун олуда буд. Духтар сухане ба забон оварда натавониста, гиря мекардааст ва ҳамеша бо ангуштонаш рақами «се»-ро нишон медодааст. Пас аз гузашти 20 дақиқаи ба манзил расидан ӯ дар дастони модараш ҷон додааст», – иброз дошт ӯ.
Ба гуфтаи Атоев, моҳи июни соли 2014 Сумайя ҳамроҳи модар ва се бародараш ба Миср рафта, дар манзили иҷора дар Қоҳира зиндагӣ мекардаанд. Падарашон дар Русия, дар яке аз ширкатҳои шаҳри Красноярск кор карда, ҳар ду моҳ аз аҳволи оилааш дар Миср хабар мегирифтааст.
«Ҳодисаи мазкур таҳти назорати ҷиддии сафорати Тоҷикистон дар Қоҳира қарор дорад. Мақомоти пулиси Қоҳира якчанд нафар афроди гумонбарро боздошт намуда, тафтишот идома дорад», – қайд кард Атоев, вале аз сабабҳои марги духтари ноболиғ ҳарфе нагуфт.
Дар ҳамин ҳол, бино ба маълумоти ВАО-и Миср, мақомоти пулиси ин кишвар қаблан дар бораи таҷовуз ба номус ва куштори духтари 14-солаи тоҷик иттилоъ дода буд. Тафтишоти пешакӣ нишон додааст, ки то марг духтар мавриди таҷовуз ва шиканҷа қарор гирифтааст. Мақомоти пулис итминон додаанд, ки барои ошкор сохтани сабабҳои марги духтари тоҷик ҳамаҷониба кӯшиш ба харҷ медиҳанд.
