Ҳукумати Тоҷикистон ва шуъбаи ҳуқуқии Маҷлиси намояндагони Маҷлиси Олии Тоҷикистон пешниҳоди узви даъвати гузаштаи палатаи болоии парлумони ҷумҳурӣ, директори мактаби таҳсилоти умуии №28-и пойтахт Гулчеҳра Ғаниеваро оид ба ворид намудани тағйироту илова ба қонун «Дар бораи масъулияти падару модарон дар таълиму тарбияи фарзанд» дастгирӣ накарданд. Дар ин бора ба «Азия-Плюс» як манбаъ аз палатаи поёнии парлумони ҷумҳурӣ хабар дод.
«Шӯрои палатаи поёнии парлумони кишвар имрӯз, 15 июн расман пешниҳоди собиқ вакили Маҷлиси миллии Маҷлиси Олии кишварро напазируфт. Ин пешниҳод аввали соли равон ҷиҳати баррасӣ ба Маҷлиси намояндагони Маҷлиси Олии ҶТ ирсол гардида буд», – қайд кард манбаъ.
Моҳияти тағйироту идоваи аз ҷониби Г.Ғаниева пешниҳодшуда дар он ифода меёбад, ки дар ҷумҳурӣ бояд барои тарбияи экологии кӯдакон масъулияти падару модарон ҷорӣ карда шавад.
«Г.Ғаниева далел меорад, ки тағйироту иловаи пешниҳодшуда ба ҳифзи муҳити зист, коҳиши партовҳои маишӣ дар ҷойҳои ҷамъиятӣ, шаҳру деҳот ва навоҳи кишвар нигаронида шудааст», – таъкид дошт сарчашмаи хабар.
