Президенти Тоҷикистон Эмомалӣ Раҳмон дар иртибот ба таркиш дар яке аз масҷидҳои пойтахти Давлати Кувайт ба амири ин кишвар Сабоҳ ал-Аҳмад ас-Сабоҳ барқияи тасаллият ирсол намуд.
Бино ба иттилои хадамоти матбуоти сарвари давлат, дар барқияи Эмомалӣ Раҳмон аз ҷумла зикр мегардад, ки «бо камоли андӯҳ хабари таркиш дар яке аз масҷидҳои пойтахтро, ки муҷиби ҳалокат ва захмӣ шудани даҳҳо шаҳрвандони бегуноҳ гаштааст, дарёфт намудам».
Гуфта мешавад, ин амали террористии ғайриинсонӣ, ки онро бо ягон далелу бурҳоне ҳақ баровардан мумкин нест, боз як намунаи аъмоли зишти ҷиноятпешагони касбист, ки муборизаи беамон бо онҳо вазифаи ҳар як фарди огоҳ аст. Тоҷикистон омода аст, дар ин ҷода ҳамкориҳои густурдаеро ба роҳ монад.
«Бо ибрози тасаллият ва таъзияи самимӣ ба Волоҳазрат хоҳишмандам ҳамдардии моро ба наздикони қурбониён бирасонанд, ки онҳоро Худованд сабри ҷамил ато фармояд », – омадааст дар барқия.
Бино ба иттилои ВАО-и ҷаҳон, масъулияти таркиш дар масҷиди шиаҳои Кувайтро, ки рӯзи 26 июн сурат гирифта буд, ҷангиёни гурӯҳи ифротгарои «Давлати исломӣ» ба дӯш гирифтаанд. Зикр мегардад, ки бар асари ин таркиш 27 нафар ҳалок ва беш аз 200 нафар ҷароҳат бардоштаанд.
