Бар асари садамаҳои нақлиёти шабонарӯзи гузашта дар роҳҳои мошингарди кишвар ду пиёдагарди ноболиғ ба ҳалокат расиданд.
Бино ба маълумоти дафтари матбуоти ВКД Тоҷикистон, нимаи дуюми рӯз ронандаи автомашинаи тамғаи “Опел-Астра”, марди 31-солаи сокини ш. Истаравшан ҳангоми ҳаракат бо кӯчаи Ленини шаҳри Истаравшан, дар рӯ ба рӯи бозори марказӣ бехатарии ҳаракати роҳро таъмин карда натавониста, пиёдагарди ноболиғ, писарбачаи 12-солаи сокини ҳамин шаҳрро пахш намудааст, ки дар натиҷа ноболиғ ҷароҳати вазнини ҷисмонӣ бардошта, дар беморхона ба ҳалокат расидааст.
Гуфта мешавад, дар ин рӯз ҳамчунин ронандаи автомашинаи тамғаи “Опел-Астра”, марди 23-солаи сокини шахри Хуҷанд ҳангоми ҳаракат дар ҳудуди ҷамоати деҳоти Унҷии ноҳияи Б.Ғафуров аз уҳдаи идораи воситаи нақлиёт набаромада, пиёдагарди ноболиғ писарчаи 9-солаи сокини ҷамоати мазкурро пахш намудааст, ки дар натиҷа ноболиғ, ҷароҳати вазнини ҷисмонӣ бардошта, дар беморхона ба ҳалокат расидааст.
Зимнан зикр мегардад, ки ҳамин рӯз боз чунин як ҳодисаи нохуш дар ҳудуди ноҳияи Ҳисор ба қайд гирифта шудааст, ки бар асари он як нафар ҳалок ва як нафари дигар бистарӣ гардидааст.
Тахминан соати 10:00-дақиқаи ҳамин рӯз трактори тамғаи “МТЗ-80”, таҳти идораи ронанда, марди 22-солаи сокини ноҳияи Ҳисор, ҳангоми ҳаракат дар роҳи автомобилгарди “Душанбе-Ҳисор-Турсунзода”, дар ҳудуди деҳаи Мортеппа, чархи ақиби тарафи рости ядакаш ҷудо шуда, ба сари ронандаи автомашинаи тамғаи “Нексия”, марди 23-солаи сокини ноҳияи Ҳисор, ки аз қафояш ҳаракат мекард, задааст. Дар натиҷа ронанда, ҷароҳати вазнини ҷисмонӣ бардошта ба ҳалокат мерасад. Баъди ин, чархи мазкур ҳамчунин ба дасти мусофири ҳамин автомашина зани 50-солаи сокини ҳамин ноҳия задааст, ки дар натиҷа зан ҷароҳати ҷисмонӣ бардошта, дар беморхона бистарӣ гардидааст.
