Раиси шаҳри Душанбе Маҳмадсаид Убайдуллоев рӯзи 21 сентябр машварати корӣ баргузор намуда, дар он масъалаҳои беҳбуди вазъи санитариву экологӣ дар шаҳр ва ҷараёни иҷрои қарорҳои қаблан қабулшудаи шаҳрдорӣ дар ин самт баррасӣ шуданд. Дар машварат роҳбарони сохторҳои ҳифзи ҳуқуқ ва масъулини дастгоҳи раиси пойтахт ҳузур доштанд.
Тавре ба «Азия-Плюс» як манбаъ аз дастгоҳи раиси пойтахт дар ин робита иттилоъ дод, зимни машварат сардори Раёсати ҳифзи муҳити зисти мақомоти шаҳрдорӣ Толиб Раҳимов таъкид доштааст, ки корхонаву ташкилотҳои воқеъ дар қаламрави шаҳр барои аз Душанбе берун бурдани партовҳо тадбирҳои саривақтӣ намеандешанд. Дар ин робита раиси пойтахт ба раисони ноҳияҳои пойтахт супориш додааст, ки барои ҳалли ин мушкилот чораҳои муассир рӯйи кор гиранд.
Ҳамчунин раиси шаҳр зимни таҳлили фаъолияти 45 гурӯҳи таблиғотии ахири моҳи август ташкилшуда, ки ба хотири миёни аҳолӣ фаҳмонидану ташвиқ кардани эҳтироми арзишҳои миллӣ ва даст кашидан аз сарулибоси бегона таъсис ёфта буданд, аз сокинони пойтахт даъват кардааст, ки аз ин иқдом дар канор намонда, дар кори таъмини сулҳу субот дар ҷомеа бо мақомоти ҳифзи ҳуқуқ бештар ҳамкорӣ кунанд.
Зимнан зикр гардид, ки дар машварат ҳамчунин ба масъалаҳои марбут ба омодагии шаҳр ба мавсими тирамоҳу зимистон, ҷараёни корҳои азнавсозии роҳҳо ва мушкилоти мавҷудаи бахши нақлиёту коммуникатсия низ таваҷҷуҳ зоҳир шуд.
