Дар марзи Тоҷикистону Ӯзбекистон (гузаргоҳи «Дӯстӣ»-и шаҳри турсунзода) гумрукчиёни тоҷик бинобар сарпечӣ аз гузаштан аз муоинаи гумрукӣ 31 тан аз шаҳрвандони хориҷи тибқи моддаи 570 Кодекси ҳуқуқвайронкунии маъмурии Тоҷикистон барои «иҷро накардани амру талаботи қонунии шахси мансабдори мақомоти гумрук» ҷарима бастанд.
Бино ба иттилои маркази матбуоти Хадамоти гумруки назди ҳукумати ҶТ, семоҳаи аввали соли ҷорӣ аз тарафи кормандони Раёсати минтақавии гумрукӣ дар шаҳри Турсунзода 169 ҳолати ҳуқуқвайронкуни дар соҳаи гумрук ба қайд гирифта шуда, вобаста ба парвандаҳои баррасишуда 169 нафар шахси воқеӣ ба ҷавобгарии маъмурӣ кашида шудааст, ки 31 нафари онҳоро шаҳрвандони хориҷӣ ташкил медиҳанд.
Гуфта мешавад, дар натиҷаи баррасии парвандаҳои ҳуқуқвайронкунии маъмурӣ шахсони ҳуқуқвайронкунанда ба маблағи умумии 17 331 сомонӣ ҷаримабандӣ шудаанд. Дар маҷмӯъ аз рӯи парвандаҳои дар давраи ҳисоботӣ оғозгардида 358 267 сомони пардохтҳои гумрукӣ рӯёнида ва ба буҷаи давлат пардохт карда шудааст.
Зикр мегардад, ки қонуншиканиҳои шаҳрвандони хориҷӣ дар муқоиса бо соли гузашта кам гардидааст. Дар соли 2015 83 нафарро ташкил карда буд, дар семоҳаи соли 2016 бошад он ба 31 расидааст ва ва бештари онҳо шаҳрвандони Туркия, Ӯзбекистон, Ҷумҳурии Исломии Эрон, Қазоқистон ва Русия мебошанд.
