Гурӯҳи аввалини иборат аз 185 нафари зойирини Тоҷикистон субҳи рӯзи 21 август аз Душанбе ба макони муқаддаси Ислом – шаҳри Мадина раҳсипор шуд.
Афшин Муқим, котиби матбуотии Кумита оид ба корҳои дин, танзими анъана ва ҷашну маросимҳои милии назди ҳукумати ҷумҳурӣ иттилоъ додааст, ки имсол сафар ба макони муқаддаси ислом ва бозгашти нисфе аз зоирон ба ватанро ширкати ҳавопаймоии миллии «Сомон Эйр» ва қисмати боқимондаро ширкати ҳавопаймоии «Flynas»-и Арабистони Саудӣ таъмин мекунанд.
Тибқи нақша, сафари зоирони тоҷик то 5 сентябр идома ёфта, муҳлати бозгашт аз он ҷо аз 17 сентябр оғоз мегардад. Арзиши ҳаҷи имсола дар Тоҷикистон 28 ҳазору 649 сомониву 10 дирамро ташкил медиҳад.
Кумитаи умури дин 5 ҳазор сомонӣ нисбат ба соли гузашта афзудани арзиши ҳаҷи имсоларо ба болоравии қурби доллари ИМА, ҳамчунин таъмини шароитҳои беҳтар барои зоирон дар Маккаву Мадина нисбат ба солҳои пешин рабт додааст.
Қобили зикр аст, ки соли равон беш аз 6 ҳазор нафар тоҷикистониён ба зиёрати Хонаи Худо ба Арабистони Саудӣ мераванд.
