Таҳти раёсати раиси шаҳри Душанбе Маҳмадсаид Убайдуллоев машварати васеи кории мақомоти шаҳрдорӣ доир гардид, ки дар он ҷараёни омодагии шаҳр ба ҷашни 25-умин солгарди Истиқлолияти давлатии Тоҷикистон баррасӣ шуд.
Тавре ба “Азия-Плюс” як манбаъ аз шаҳрдории пойтахт дар ин робита хабар дод, М.Убайдуллоев ба ҳамаи сохторҳое, ки дар кӯчонидани бинову иншооти ғайриқонунӣ дар шаҳр сохташуда саҳм гирифтанд, миннатдорӣ изҳор намуда, таъкид дошт, ки минбаъд корҳо дар ин самт идома хоҳанд ёфт.
Бо назардошти дар хиёбони Исмоили Сомонӣ баргузор шудани чорабиниҳои асосии ҷашнӣ, тасмим гирифта шуд, ки аз 6 то 10 сентябр ҳаракати троллейбусҳо дар ин хиёбон мутаваққиф шуда, лавҳа ва шиорҳои идона шабона гузошта шаванд.
