Дар пайи селу обхезиҳои шаби гузашта дар шаҳри Кӯлоб се нафар ҷон бохта, се тани дигар бо ҷароҳатҳои гуногун дар бемористон бистарӣ шудаанд. Дар ин бора хадамоти матбуоти раиси вилояти Хатлон иттилоъ дода, гуфтааст, ки сел ба манзилҳои шаҳрвандон, бархе сохтмонҳои иҷтимоӣ ва шаҳрӣ зарари ҷиддӣ расонидааст.
Ҳанӯз хисороти мушаххаси ин офати табиӣ эълон нашудааст, вале дар наворҳое, ки корбарони шабакаҳои иҷтимоӣ сабт кардаанд, дида мешавад, ки сел ба роҳу манзилҳои сокинон ворид гардидааст ва бархе маҳаллаҳо зери об мондаанд.
Як манбаъи “Азия-Плюс” шаби гузашта, 1-уми май гуфт, ки яке аз ҷонбохтагон баъди ба болояш чапа шудани девор ҷонашро аз даст додааст.
Радиои Озодӣ аз қавли Раёсати КҲФ дар минтақаи Кӯлоб навиштааст, ки ду нафар аз фавтидагон Абумуслим Давлатови 44-сола ва Набиамон Фозилови 58-сола, зери девор монда, ҷонашонро аз даст доданд. Як фавтидаи дигар Мирзо Мулониёзови 45-сола, аз шиддати барқ ҳалок шудааст.
Ин расона навиштааст, ки дар пайи боридани борони сахт, сел ба 850 манзили зист даромадааст. Ин хонаҳо дар маҳаллаҳои Хати роҳ, Қурбон Зардаков, Нонбойи поён, Суғдиён, Заринкуҳ, Абдураҳмони Ҷомӣ, 20-солагии Истиқлолият, Саросиёб, Мадином Ибронов, Панҷосиёб ва Файзободи болои шаҳри Кӯлоб ҷойгир ҳастанд.
Ҳоло, ба гуфтаи мақомот, дар кӯчаву маҳаллаҳои зарардидаи шаҳри Кӯлоб корҳои бартарафсозии оқибатҳои сел ва тозакунии минтақаҳо ҷараён доранд.
Ба гуфтаи манбаъ, ба масъулон супориш шудааст, ки корҳои наҷотдиҳӣ, барқарорсозӣ ва расонидани кумак ба аҳолии зарардидаро дар муҳлатҳои кӯтоҳ анҷом диҳанд.
“Давлатали Саид дастур додааст, ки аҳолие, ки дар ҷойҳои зери хавф зиндагӣ мекунанд ба ҷойҳои бехавф кучонида шуда, ба зарар дидагон кумаки ғизои, тиббӣ расонида шавад”,- навиштааст хадамоти матбуотии раиси вилоят.
Дар ин ҷаласа ба сохторҳои марбута дастур шудаст, ки дар робита ба бартараф кардани оқибатҳои табибиӣ ситоди шабонарӯзӣ ташкил карда, тамоми чораҳои заруриро баҳри бартараф кардани оқибатҳои офатии табибиӣ андешанд.
Дар ҳамин ҳол, Эмомалӣ Раҳмон, раисҷумҳури Тоҷикистон субҳи имрӯз, 2-юми май ба оилаҳои шахсони ҷонбохта изҳори ҳамдардӣ карда, ба масъулин барои бартараф кардани оқибатҳои ҳодиса супориш додааст.
Ҳамчунин, раисҷумҳур ба сарвазири кишвар, раиси вилояти Хатлон ва Комиссияи давлатии ҳолатҳои фавқулода дастур додааст, ки “фавран ба ҷойи ҳодиса ҳозир шуда, барои расонидани кумак ба оилаҳои зарардида ва ҳарчи зудтар бартараф кардани оқибатҳои офати табиӣ ҳамаи тадбирҳои заруриро амалӣ намоянд”.
Ҳавошиносон қаблан ҳушдор дода буданд, ки дар Тоҷикистон то 4-уми май боронҳои шадид ва омадани сел пешбинӣ мешавад. Дар ду рӯзи гузашта дар кишвар борону жолаи шадид борида, дар дигар минтақаҳо ҳам сел омада буд.
