Даниел Рустамов, сокини бистсолаи Душанбе, нерӯи овозхонии худро дар даври аввали барномаи X-Factor-и Украина санҷид ва аз ҳамаи доварони барнома баҳои аъло гирифт. Ӯро ба камияш ду даври дигари мушкил дар пеш аст.
Бино ба иттилои Радиои Озодӣ, ин нахустин бор аст, ки як ҷавони тоҷик дар барномаи X-Factor иштирок кардааст ва видеои ҳунарнамоии ӯ дар Интернет бо даҳҳо шарҳи ифтихоромез ҳамроҳ аст. Саҳнаи ҳунарнамоии Даниел шоми 8 октябр тариқи телевизиони Украина намоиш дода шуд.
Тасодуфан рӯзе як нафар ба ман навишт, ки оё мехоҳам дар барномаи X-Factor-и Украина ҳунарамро намоиш диҳам? Розӣ шудам ва ҳамин тавр орзу маро то Киев бурд
Даниел Рустамов 9 октябр дар суҳбати телефонӣ бо Радиои Озодӣ аз Маскав гуфт, даври аввали барнома моҳи июли имсол сабт шуда ва баъди бандубасташ тоза намоиш дода шудааст. Ӯ гуфт, барои санҷидани истеъдоди овозхонӣ ва боло будани обрӯи Тоҷикистон то Украина рафт ва хост нишон диҳад, ки тоҷикон фақат муҳоҷири корӣ нестанд ва набояд ба онҳо бо чашми ҳақир нигарист. Доварони барномаи X-Factor низ гуфтаанд, ки Даниел ба ҳадафаш наздик шудааст.
"Бори аввал ба Маскав барои таҳсил омадам. Ҳамдарсонам аз ман пурсиданд, ки куҷоӣ ҳастам? Вақте гуфтам аз Тоҷикистон, безеб нигоҳ карданд", – нақл кард Даниел. Ӯ мегӯяд, баъд аз ин чанд бор талош кард дар барномаи истеъдодҳои Русия иштирок кунад, аммо дархости ӯро ба назар нагирифтаанд. "Тасодуфан рӯзе як нафар ба ман навишт, ки оё мехоҳам дар барномаи X-Factor-и Украина ҳунарамро намоиш диҳам? Розӣ шудам ва ҳамин тавр орзу маро то Киев бурд", – афзуд ӯ.
Рустамов соли дувум аст, ки дар Донишкадаи давлатии ҳунарҳои Маскав таҳсил мекунад ва дар барномаи X-Factor таронаи Radioactive аз гуруҳи Imagine Dragons-ро иҷро кард. Константин Меладзе, яке аз доварони барнома гуфт, дар аввал фикр кард, як сарояндаи оддист, ки таронаи оддӣ иҷро мекунад, "аммо дар идома ҷозибае дорад, ки туро ба сӯи худ мекашад". Даниел ҳам мегӯяд, бисёр орзу дошт, рӯзе дар ҳузури Констанин Меладзе тарона иҷро кунад ва ин фурсат барояш даст додааст.
