Ваколатдори ҳуқуқи инсон (омбудсмен)-и Тоҷикистон Зариф Ализода бар ин назар аст, ки барои ҳалли масъалаи иҷро нашудани қарорҳои суд ҷорӣ кардани рӯйхати қарздорон зарур аст, ки бештар ба масъалаи ҷуброни зиёни молӣ дахл дорад.
«Дар иҷрои қарорҳои судӣ мушкилоти зиёд ҷой дорад. Қаблан судиҷрочиён ба мақомоти судӣ тобеъ буданд, ҳозир бошад, ба Вазорати адлия. Аз ин рӯ, баъзе номувофиқатиҳо ҷой дорад, аз ҷумла дар механизими корҳо», – гуфт ӯ зимни нишасти хабарӣ оид ба ҷамъбасти фаъолияти ин ниҳод дар соли 2017.
Ба гуфтаи ӯ, ба Тоҷикистон қабули таҷрибаи дигари кишварҳо, ки дар онҳо «рӯйхати қарздорон» тартиб дода мешавад, зарур мебошад.
«Ба ин рӯйхат шахсоне, ки натанҳо қарзашонро бо қарорҳои судӣ, балки қарзи бонкиашонро низ пардохт намекунанд, дохил шуда метавонанд, ки ин дар навбати аввал баро иҷрои маҷбурии қарорҳо лозим аст. Масалан, барои ин шахсон муваққатан метавон сафар ба хориҷи кишварро маҳдуд кард, зеро ҳолатҳои зиёде мавҷуданд, ки шахси қарздор бидуни монеъа кишварро тарк мекунад», – қайд кард ӯ.
Зимнан зикр гардид, ки баррасии масъалаи иҷро нашудани қарорҳои судӣ имсол дар ниҳоди Ваколатдор оид ба ҳуқуқи инсон ба нақша гирифта шудааст. «Мо ин масъаларо омӯхта, назари худро дар мавриди ҳаллу фасли он пешниҳод мекунем», – афзуд ӯ.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
