Навраси 15-солаи сокини шаҳри Кӯлоб, ки аз роҳ мегузашт, зери чархи автомашинаи муфаттиши Раёсати ВКД шаҳри Кӯлоб монд.
Суръати ҳаракати автомашина баланд буда, баъди пахши наврас боз 15-20 метр ӯро бо худ кашола карда бурдааст. Дар натиҷа наврас дар бемористон ҳалок шудааст.
Дар прокуратураи шаҳри Кӯлоб ин маълумотро тасдиқ намуда, хабар доданд, ки ин ҳодисаи фоҷеабор шаби 13 феврал назди терминали Кӯлоб-Восеъ рух додааст.
«Автомашинаро муфаттиши Раёсати ВКД дар шаҳри Кӯлоб Саидмӯмин Исломов идора мекард. Ӯ бо автомашинааш сокини 15-солаи шаҳри Кӯлоб, хонандаи мактаби №6 Фирдавс Ҳалимовро паххш кардааст», – гуфт манбаъ.
«Тафтиши парванда аз рӯи далели ҳодисаи садамаи нақлиёт махфӣ буда, мо дар бораи боз шудан ё нашудани парвандаи ҷиноӣ маъулмот намедиҳем. Ҳамчунин доир ба дар ҳабс ё дар озодӣ қарор доштани Саидмумин Исломв низ маълумот пешниҳод намекунем. Парванда махфӣ аст», – айнан гуфтанд дар прокуратураи шаҳри Кӯлоб.
Қобили зикр аст, ки ҳам дар Вазорати корҳои дохилӣ ва ҳам дар Прокуратураи генералӣ аз шарҳи ин маълумот худдорӣ варзиданд.
Дар ҳамин ҳол, бино ба маълумоти Радиои Озодӣ бо истинод ба Абдулазиз Азизов, амаки Фирдавс, соати 1-и шаб ӯро чанд нафар омада хабардор карданд, ки ҷиянашро мошин зер кардааст.
«Дар бадани кӯдаконам донача баромада буд. Гуфтам, ки аз дорухона спирт биорад, то бимолем. Соати 1-шаб ду-се нафар омада, хабар карданд, ки ҷиянатонро мошин зад. Тамоми аъзои баданаш, аз ҷумла сар, шикаста буд. Аз даҳону бинияш хун рехта буд. Аммо аз нафаре, ки зада буд, ҳеч нишоне набуд», – гуфтааст ӯ.
Ба иттилои манбаъ, масъулони прокуратураи шаҳри Кӯлоб сарусадо дар бораи гӯё маст будани капитан Саъидмӯъмин Исломовро ҳангоми ҳодиса рад кардаанд. «Капитан Исломов баъди ба бемористон расондани Фирдавс ба ҷои кори худ дар шӯъбаи корҳои дохилии шаҳри Кӯлоб рафта, субҳ мақомоти тафтишотӣ ӯро аз ташхиси тиббӣ-додгоҳӣ гузарондаанд», – гуфтааст яке аз кормандони прокуратура.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
