Аз 1 май ҳаракати воситаҳои нақлиёти гаронвазн тариқи роҳи Душанбе – Чаноқ маҳдуд карда мешавад. Маҳдудияти мавсимӣ то охири моҳи август давом мекунад.
«Бо дарназардошти фаро расидани мавсими гармо, шурӯъ аз 1-уми майи соли равон то 31 августи ҳамин сол маҳдудияти ҳаракати воситаҳои нақлиёт аз соати 10:00 то 20:00 ҷорӣ мешавад», – хабар медиҳад филилаи ширкати Innovative Road Solutions.
Зимнан шарҳ дода мешавад, ки ин маҳдудият ба воситаҳои нақлиёти гаронвазн дахл дошта, ба ҳар як тири пешбаранда на зиёда аз 6 тонна пешбинӣ шудааст.
Гуфта мешавад, икдоми мазкур ҷиҳати иҷрои талаботи қарори ҳукумати Тоҷикистон «Оид ба ҷорӣ намудани маҳдудияти мавсимии ҳаракати воситаҳои нақлиёт дар роҳҳои истифодаи умум» амалӣ шуда, ҷиҳати эмин нигоҳ доштани роҳ аз вайроншавии пеш аз муҳлат ва таъмини бехатарии мусофирону ронандагон ва воситаҳои нақлиёт шароит фароҳам меорад.
Қайд мешавад, ки чунин иқдом на танҳо дар Тоҷикистон, балки дар аксарияти мамлакатҳои олам роиҷ буда, натиҷаҳои хуб ба бор овардааст.
Бар пояи конссесияи имзошуда бо ҳукумат, филиали ширкати IRS аз моҳи апрели соли 2010 ба идоракунии зербинои роҳи мошингарди Душанбе – Чаноқ машғул аст. Айни замон дар ин роҳ шаш плаза – Варзоб Ҳушёрӣ, Шаҳристон, Истаравшан, Деҳмой ва Чорух амал мекунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
