Чӣ гуна метавон рафтор кард, вақте ки бо сабабҳои техникӣ чароғаки роҳ (светофор) кор намекунад ва шумо бо мошинатон гузаштаниед?
Рӯзи якшанбеи ҳафтаи гузашта корбарони гурӯҳи «Я душанбинец-2» дар Facebook сари вазъе, ки дар чорраҳаи назди боғи ба номи Алишер Навоӣ ба вуҷуд омад, баҳс карданд.
“Аллакай 10-15 дақиқа дар чорраҳаи назди боғ ранги сурхи чароғак фурӯзон аст, – навишт Михаил Петрушков. – Камераҳои “Шаҳри бехатар” кор карда, ҳамаи мошинҳоеро, ки дар ранги сурхи чароғак мегузаранд, сабт мекунанд. Дар ин ҳолат ронандагон ҳақ будани худро чӣ гуна исбот мекунанд?”.
Малика Окимбекова, Раҷабалӣ Мирзомуродов, Мурод Холиқов ва дигар аъзои гурӯҳ низ корношоям будани чароғакро дар ин кӯча тасдиқ карданд.
“Аз соати 14 вазъ чунин аст, – навиштааст Фаррух Ҷалолов. – Ман хостам занг занам лекин намедонам ба куҷову ба кӣ”.
Ҷарима намешавад
Аз хадамоти “Шаҳри бехатар”-и пойтахт шарҳи ин масъаларо дархост кардем.
“Ноқисиҳои ҷиддии техникӣ дар кӯчаҳои шаҳр маъмулан дарҳол аз ҷониби хадамоти БДА сабт мешавад ва бригадаи таъмиргарон зуд ба он ҷо сафарбар мешаванд. Дар дигар ҳолатҳо бо огоҳии аввалини шаҳрвандон ба ҷойи ҳодиса ҳозир мешавем”, – хабар дод ба “Азия-Плюс” подполковник Фурқат Шоҳимардонов.
Дар робита ба масъалаи баҳси сокинони пойтахт дар шабакаҳои иҷтимоӣ ӯ гуфт, ки зимни кор накардани чароғак ронандагон ҷарима намешаванд.
“Камераҳои мушоҳидаи видеоӣ натанҳо ҳолати вайрокунии қоида, балки вазъ дар ҳамон қитъаи роҳро ба сурати умум сабт мекунанд, – шарҳ дод Шоҳимардонов. – Агар шуморо барои вайрон кардани қоида дар ҳамон қитъаи роҳ, ки чароғак корношоям буд, ҷарима кунанд, инро метавон ба осонӣ тариқи азназаргузаронии сабтҳои камераҳои мушоҳидавӣ ошкор кард. Бо истифода аз фурсат ба сокинони шаҳр хотиррасон карданиам, ки дар сурати дидани ҳолати корношоямии чароғак ё дигар мушкилот дар роҳҳо, бетарафӣ накунед ва як дақиқа вақтатонро сарф карда, ба рақамҳои фаъоли БДА: 235-65-94, 235-79-29 ё 236-09-34 занг занед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
