Имрӯз, 11-уми октябр, Александр Лукашенко, президенти Беларус, бо сафари расмӣ ба Тоҷикистон меояд. Дар ин бора РИА “Новостӣ” бо такя ба ВКХ Тоҷикистон хабар медиҳад.
Ба иттилои манбаъ, сафари расмии президенти Беларус ба Тоҷикистон 2 рӯз идама меёбад ва дар назар аст, ки сарони давлатҳо Александр Лукашенко ва Эмомалӣ Раҳмон мулоқот хоҳанд кард.
Ҷонибҳо дар робита ба тавсеаи ҳамкориҳо, пеш аз ҳама дар арсаи тиҷориву иқтисодӣ, иҷрои тарҳҳои ҷорӣ ва оянда гуфтугӯ менамоянд. Дар пайи музокирот ба имзо расидани як бастаи санадҳо дар назар аст.
Гуфта мешавад дар рӯзи дуввуми сафар Лукашенко дар пойтахти Тоҷикистон чанд дидори дагар анҷом медиҳад.
Ҳамзамон, бо сафари расмии Лукашенко дар Душанбе ҳамоиши сармоягузории Тоҷикистону Беларус баргузор шуда, намоишгоҳи истеҳсолкунандагони беларусӣ “Made in Belarus” ташкил мешавад.
