Имрӯз, 11-уми октябр президенти Ҷумҳурии Беларус Александр Лукашенко бо сафари расмӣ ба Ҷумҳурии Тоҷикистон ташриф овард.
Ӯро дар фурудгоҳ сарвазири Тоҷикистон Қоҳир Расулзода пешвоз гирифт.
Баъдан маросими истиқболи расмии президенти Белорус дар назди Қасри миллат баргузор гардид. Дар ин бора АМИТ “Ховар” иттилоъ медиҳад.
Ба навиштаи ин расона, Президенти Ҷумҳурии Тоҷикистон Эмомалӣ Раҳмон Президенти Ҷумҳурии Беларус Александр Лукашенкоро истиқбол гирифта, ба болои шоҳсуфаи ифтихорӣ даъват кард.
“Маросими истиқбол бо гузориши командири қаровули фахрӣ, садо додани сурудҳои миллии ду кишвар, гузаштани сарони давлатҳо аз назди сафи қаровули фахрӣ, арзи эҳтироми меҳмони олимақом ба Парчами давлатии Тоҷикистон, шиносоӣ бо ҳайатҳои расмии ду ҷониб ҷараён гирифта, бо қадамзании мутантан гузаштани ҷузъу томҳои қаровули фахрӣ аз назди сарони ду давлат анҷом ёфт”, – гуфта мешавад дар хабар.
