Бинои як мактаби шаҳри Душанбе ба ихтиёри Донишгоҳи славянии Русия ва Тоҷикистон (ДСРТ) дода шуд. Маросими имзои санад дар ин бора дар доираи сафари муовини сарвазири Русия Марат Хуснуллин ба Душанбе баргузор шуд, хабар медиҳад ТАСС.
Шартнома аз ҷониби муовини вазири маориф ва илми Русия Константин Могилевский ва вазири маориф ва илми Тоҷикистон Раҳим Саидзода имзо шуд.
Мувофиқи ин санад, бинои мактаби таҳсилоти миёнаи умумии №52-и шаҳри Душанбе ба тавозуни ДСРТ гузаронида мешавад. Гуфта мешавад, ин ба беҳбуди заминаи моддии муассиса ва таъмиру навсозии он имкон фароҳам меорад.
Дар маросими имзои санад ҳамчунин муовини сарвазири Русия Марат Хуснуллин ва сарвазири Тоҷикистон Қоҳир Расулзода ҳузур доштанд.
Донишгоҳи славянии Русия ва Тоҷикистон бо қарорҳои ҳукуматҳои Тоҷикистон ва Русия соли 1996 таъсис дода шуд. Донишгоҳ аввалин муассисаи таълимии олии байнидавдатии ҳарду кишвар буда, ҳам дар Тоҷикистон ва ҳам дар Русия мақоми донишгоҳи давлатиро дорад.
