Зулфия Давлатзода, вазири фарҳанги Тоҷикистон зимни нишасти матбуотии имрӯза хабар дод, ки ба эҳтимоли зиёд ёдгориҳои таърихию фарҳангии долони “Зарафшон-Қароқум” моҳи сентябри соли 2023 ба Рӯйхати асосии мероси фарҳанги ҷаҳонии ЮНЕСКО шомил мешаванд.
Ба гуфтаи ӯ, Иҷлосияи навбатии ЮНЕСКО дар Арабистони Саудӣ баргузор мешавад ва намояндагони созмон дар ин ҷо хулосаи ниҳоиро мебароранд.
Инчунин, вазири фарҳанг афзуд, то охири соли 2023 корҳои номинатсионии долони “Фарғона-Сирдарё” пурра ба анҷом расонида шуда, барои шомил намудани ёдгориҳои долони мазкур ба Рӯйхати пешакии мероси фарҳанги умумибашарӣ ирсол мегардад.
“Ҳамзамон, корҳо оид ба пешбурди номинатсияи “Ҳулбук-Хуттали қадим” аз ҷониби мутахассисони вазорат бо ҷалби коршиносони байналмилалӣ дар сатҳи хуб ба роҳ монда шудааст”, – илова кард Зулфия Давлатзода.
Зулфия Давлатзода ҳамчунин гуфт, рӯзҳои 3-5-уми октябри соли 2023 дар пойтахти кишвар намоиши байналмилалии “Китоби Душанбе” баргузор мешавад.
“Мактубҳои расмӣ ба вазорати фарҳанги як қатор кишварҳои ҷаҳон фиристода шуда, аз онҳо расман даъват шудааст, ки дар намоиши байналмилалии “Китоби Душанбе” ширкат варзанд”, – гуфт Давлатзода.
Зулфия Давлатзода инчунин, дар нишасти матбуотӣ рақси мардонаи сокинони Бадахшонро тавсиф кард.
“Рақси мардона қонунҳои худро дорад ва беҳтар аст, ки донем. Мардони ВМКБ қонунҳои рақси мардонаро хуб медонанд ва зебо ҳам мерақсанд. Занони ин минтақа низ рақси вижаи худро доранд”, – гуфт Давлатзода.
Зулфия Давлатзода илова кард, ки дар озмуни ҷумҳуриявии “Андалеб” номинаи рақси мардона ҳаст ва хоҳишмандону шавқмандон метавонанд дар он ширкат варзанд.
