Аз Маркази бодуҳавошиносии ҷумҳурӣ ба ОИ “Азия-Плюс” хабар доданд, ки то охири моҳи январ дар Душанбе барф намеборад. Ҳамчунин, тибқи иттилои ин ниҳод, бориши барф дар моҳи охири зимистон низ номаълум аст.
Гуфта мешавад, ки то охири моҳи ҷорӣ дар вилояти Хатлон гармшавии ҳаво мушоҳида мешавад. Аз ҷумла, дар водиҳо то охири моҳи январ ҳарорати ҳаво аз 12—17 дараҷа то 18—27 дараҷа гарм мешавад.
Рӯзҳои 28 – 31-уми январ бошад, бориши борон дар назар аст.
Дар ноҳияҳои доманакӯҳ рӯзҳои 18 – 24-уми январ бебориш ва аз 25 то 31-уми январ боришот (борону барф) дар назар аст. Ҳарорати ҳаво дар доманакӯҳҳо рӯзона 7 – 12 дараҷа гарм мешавад.
Аз 18 то 27-уми январ дар манотиқи вилояти Суғд бебориш шуда, аз 28 то 31-уми январ дар баъзе ҷойҳо боридани боришот (борону барф) дар назар аст.
Дар ноҳияҳои кӯҳии шимоли кишвар то 24-уми январ боришот дар назр набуда, аз 25 то 31-уми январ дар баъзе ҷойҳо борон ва барф меборад. Ҳаво дар водиҳо рӯзона 3 – 8 дараҷа, дар ноҳияҳои кӯҳӣ рӯзона 1 – 4 дараҷа гарм мешавад.
Дар водиҳои ноҳияҳои тобеи ҷумҳурӣ то 24-уми январ боришот дар назар нест ва аз 25 то 31-уми январ дар баъзе ҷойҳо борон меборад. Хаво рӯзона то 10—15 дараҷа гарм мешавад. Дар ноҳияҳои кӯҳӣ рӯзона аз 3 то 8 дараҷа гарм, 25 – 31 январ боришот (борону барф) мешавад. Шабона аз -4 то +1 хоҳад буд.
Дар Вилояти Мухтори Кӯҳистони Бадахшон то 24 январ ҳавои бебориш дар назар дошта шуда, аз 24 то 31-уми январ борону барф меборад. Ҳарорати ҳаво дар ғарби ВМКБ рӯзона аз 1 дараҷа хунук то 4 дараҷа гарм, дар шарқи ин вилоят шабона аз 19 то 24 дараҷа ва рӯзона аз 5 то 10 дараҷа сард мешавад.
