Раёсати ВКД дар шаҳри Душанбе аз сокинон талаб кардааст, ки ба нигоҳдории ҳайвонот дар ҳудуди пойтахт хотима диҳанд, вагарна ҷарима хоҳанд шуд.
Ин ниҳод дар телеграм-канали худ навиштааст, ки дар асоси қарори Маҷлиси вакилони халқи шаҳри Душанбе муҳлати парвариш ва нигоҳдории ҳайвонот дар ҳудуди пойтахт, ки ду сол тамдид гардида буд, аз аввали соли ҷорӣ ба итмом расид.
Раёсати ВКД дар шаҳри Душанбе нигаронӣ кардааст, ки баъзе аз шаҳрвандон то ҳол дар манзили истиқоматии худ чорвои гуногун парвариш мекунанд.
Як санҷиши ин ниҳод 200 ҳолати ғайриқонунӣ нигоҳдории ҳайвонот дар пойтахтро ошкор кардааст. Сокинони пойтахт, ки дар хонаи худ ҳайвонот нигоҳ доштаанд, бар асоси моддаи 480 иловаи 1 Кодекси ҳуқуқвайронкунии маъмурии Ҷумҳурии Тоҷикистон ҷарима шудаанд.
Ин банди қонун ҷаримаро барои шахсони воқеӣ аз 720 то 3 600 сомонӣ ва барои шахсони ҳуқуқӣ аз 7 200 то 28 800 сомонӣ муқаррар кардааст.
Дар пайи ин, Раёсати ВКД дар шаҳри Душанбе аз сокинон талаб кардааст, ки ҳар чи зудтар камбудҳои ҷойдоштаро бартараф намуда, ба парвариши ҳайвонот дар ҳудуди пойтахт роҳ надиҳанд, зеро баргузории рейду амалиётҳои санҷишӣ ба роҳ монда мешавад.
Аввали сол, вақте муҳлати парвариш ва нигоҳдории ҳайвонот дар ҳудуди пойтахт поён ёфта буд, мо ба минтақаҳои ба Душанбе пайваста рафтем ва бо сокинони он суҳбат кардем. Ва дидаву шунидаи худро дар матлаби “Ҷанг” бо мурғу говҳо дар Душанбе бо чӣ анҷом меёбад? Гирд овардем, ки метавонед мутолиа кунед.
