Рӯзи 11-уми июн дар қароргоҳи ЮНЕСКО дар шаҳри Пориси Фаронса ба муносибати 700-солагии Ҳофизи Шерозӣ намоиши ҷашнӣ, Конфронси илмии байналмилалӣ таҳти унвони “700 сол бо Ҳофиз” ва барномаи фарҳангӣ таҳти унвони “Шоми шашмақом” баргузор гардид.
Вазорати фарҳанг мегӯяд, ки дар намоиш аз фонди тиллоии Осорхонаи миллӣ ва Маркази мероси хаттии Академияи илмҳои Тоҷикистон нусхаҳои дастнавис ва китобҳои чопи сангии "Девон"-и Ҳофизи Шерозӣ ба намоиш гузошта шудаанд.
Ҳамчунин, намунаҳои ҳунари хушнависӣ ва асарҳои санъати миниётурнигории Олимҷон Комилзода, рассом-миниётурнигори тоҷик ба маърази тамошо гузошта шудааст.
Гуфта мешавад, намунаҳои гуногуни ҳунарҳои қадимаи миллӣ, чун сӯзаниҳо, атласу адрас, мисгарӣ, кандакории рӯйи чӯб, кунда ва дигар мероси фарҳангӣ ҷузъе аз намоишгоҳи мазкур аст.
Дар конфронси илмии байналмилалии “700 сол бо Ҳофиз” Матлубахон Сатториён, вазири фарҳанги Тоҷикистон, чанде аз олимону пажуҳишгарони тоҷик дар бораи нақши Ҳофиз дар адабиёти ҷаҳон суханронӣ карданд.
Дар барномаи фарҳангии “Шоми шашмақом” ансамбли давлатии “Шашмақом”-и ба номи Фазлиддин Шаҳобов таҳти роҳбарии Фурқат Саидзода, Ҳунарпешаи халқии Тоҷикистон ва ансамбли рақсии “Гулрез”, инчуқнин чанде аз ҳунарманджони дигар иштирок кардаанд.
Дар барномаи фарҳангии “Шоми шашмақом” Матлубахон Сатториён, вазири фарҳанг ва Сироҷиддин Муҳриддин, вазири корҳои хориҷии Тоҷикистон ширкат кардаанд.
Вазири корҳои хориҷии кишвар дар баромади худ гуфтааст, ки “баргузории чунин чорабиниҳо дар сатҳи байналмилалӣ на танҳо василаи муаррифии ҳунари миллист, балки саҳми арзандае дар таҳкими муколамаи байнифарҳангӣ мебошад”.
Ҷашнвораи байналмилалии “700 сол бо Ҳофиз”, ки дирӯз дар Фаронса оғоз шуд, то 14-уми июн давом мекунад, доир шудааст.
