Дар қуръакашии Лигаи дуюми қаҳрамонҳои Осиё, дастаи “Истиқлол”-и Тоҷикистон боз рақиби дастаи “Ал-Наср”-и Арабистони Саудӣ шуд, ки дар он Криштиану Роналду, футболбози маъруфи пуртуғолӣ бозӣ мекунад. Ҳамакнун, имкон дорад, ки ин ситораи маъруфи футбол ба Тоҷикистон биёяд.
Қуръакашӣ, имрӯз, 15-уми август, дар шаҳри Куала-Лумпури давлати Малайзия баргузор гардид. Дастаи "Истиқлол" дар гурӯҳи "D" ҳамроҳ бо дастаҳои "Ал-Наср"-и Арабистони Саудӣ, "Ал Завра"-и Қатар ва "Гоа"-и Ҳиндустон қарор гирифт.
Рақобатҳои марҳилаи гурӯҳии Лигаи қаҳрамонҳои дуюми Осиё рӯзи 16-уми сентябр оғоз хоҳанд шуд. Дар ин марҳила дастаи “Истиқлол”-и Душанбе ду маротиба бо дастаи “Ал-Наср” – як маротиба дар майдони худ ва маротибаи дигар дар сафар бозӣ мекунад. Ҳоло ҷадвали бозиҳо маълум нашудааст.
ИЗОБРАЖЕНИЕ "Истиқлол" дар гурӯҳи "D" бо "Ал-Наср"-и Арабистони Саудӣ, "Ал Завра"-и Қатар ва "Гоа"-и Ҳиндустон қарор гирифт.
Ёдрас мешавем, ки қаблан ҳам дастаҳои “Истиқлол”-и шаҳри Душанбе ва “Ал-Наср”-и Арабистони Саудӣ дар мусобиқаи Лигаи қаҳрамонҳои Осиё дар мавсими солҳои 2023/2024 рӯёрӯйи ҳам қарор гирифта, ду бозӣ баргузор карданд.
Дар бозии якум дар шаҳри Риёз “Ал-Наср” бо натиҷаи 3:1 “Истиқлол”-ро ноком кард ва рақобати дуюм дар Душанбе, ки бидуни Роналду доир гашт, бо ҳисоби 1 бар 1 мусовӣ шуд.
Он замон ҳам омадани Криштиану Роналду ба Тоҷикистон сарусадоҳои зиёдеро барпо карда буд, вале билохира ӯ ба Душанбе наомад.
Маъмурияти бошгоҳи “Ан-Наср” наомадани Роналду ба Тоҷикистонро ба ҷароҳати ӯ дар рақобат бо “Персеполис”-и Эрон рабт дода, гуфта буданд, то ба ҳол шифо наёфтааст.
“Бинобар ин сабаб, Роналдуро роҳбарияти тим истироҳат додаанд ва дар бозӣ муқобили “Истиқлол” ба Душанбе намеояд. Ҳамин тавр, бо наомадани Роналду орзуи мухлисони зиёди футболи тоҷик, ки хоҳиши аз наздик дидани бозии ӯро доштанд, ҷомаи амал напӯшид”, – навишта буд он вақт ТВ “Варзиш”.
ИЗОБРАЖЕНИЕ
Бояд гуфт, дар ҳайати “Ал-Наср” ба ҷуз аз Криштиану Роналду, бозигарони машҳуре ба монанди Садио Мане, Эмерик Ляпорт, Жуан Феликс, Отавио Эдмилсон ва дигарон низ ҳунарнамоӣ мекунанд.
