Ба ин муносибат рӯзи 18-уми апрел соати 09:00 дар Душанбе ниммарафони анъанавии байналмилалӣ оғоз мешавад, ки дар он варзишгарон аз Тоҷикистон ва дигар кишварҳо ширкат меварзанд. Масофаи дави ниммарафон 21 км 97,5 метр буда, аз роҳи назди маҷмаааи “Наврӯзгоҳ” оғоз ва дар ҳамон ҷо ба охир мерасад.
Консерт ва барномаи фарҳангӣ
Тавре ки ба “Азия-Плюс” ҳукумати шаҳри Душанбе хабар доданд, консерти асосӣ ва барномаи фарҳангӣ бахшида ба ин ҷашн дар толори Мактаби кӯдаконаи мусиқии ба номи Одина Ҳошим соати 14:00 баргузор мешавад.
То оғози консерт, маросими супоридани ҷоизаҳо ба ғолибони озмунҳои шаҳрӣ дар соҳаи тандурустӣ ва маориф, аз ҷумла “Беморхонаи сол”, “Табаиби сол”, “Табиби оилавии сол”, “Корманди миёнаи тиббии сол”, “Мураббии сол”, “Омӯзгори сол”, “Хонандаи сол” мегузарад. Ғолибон бо мукофоту туҳфаҳои шаҳрдории Душанбе сарфароз гардонида мешаванд.
Пас аз маросими тақдими ҷоизаҳо, барномаи фарҳангӣ ва ҳунарнамоии овозхону сарояндагон ва дастаҳои ҳунарӣ пешкаши ширкаткунандаҳо мешавад.
Чорабиниҳои варзишӣ ва дигар рӯйдодҳои ҷашнӣ
Ба ин муносибат, аллакай дар Душанбе чорабиниҳои варзишӣ, аз ҷумла мусобиқоти футболи хурд миёни наврасон, озмунҳо миёни мактабҳои мусиқии шаҳр ҷараён доранд.
Дар чор ноҳияи шаҳр, бахусус дар боғҳои фарҳангу фароғат ба ифтихори Рӯзи пойтахт шомҳои ҷашнӣ ва чорабиниҳои фарҳангӣ ва варзишӣ баргузор мешаванд.
Бо супориши раиси шаҳри Душанбе Рустами Эмомалӣ барои ташкили мусобиқот ва чорабиниҳо аз маблағҳои Фонди рушди пойтахт 590 ҳазор сомонӣ ҷудо шудааст.
Ёдрас мекунем, ки мувофиқи қонуни ҶТ “Дар бораи рӯзҳои ид”, аз 1 марти соли 2005 рӯзи шанбеи сеюми моҳи апрел Рӯзи пойтахти Тоҷикистон ҷашн гирифта мешавад.
