Чанд ширкати қатарӣ дар ду рӯзи мусоҳибаи маҷозӣ бо корҷӯёни тоҷик аз миёни 54 довталаб танҳо 6 касро ба кор қабул кардаанд. Ин шахсон дар як қаҳвахона ба ҳайси пешхидмат ва қаҳваомадакун интихоб шудаанд. Музди маош барои ин вазифаҳо то 5,4 ҳазор сомонӣ аст.
Аз Оҷонсии бокортаъмикунӣ дар хориҷаи Вазорати кору муҳоҷирати Тоҷикистон рӯзи 15-уми апрел ба “Азия-Плюс” гуфтанд, ки корҷӯёни тоҷик баъди омода шудани ҳуҷҷатҳояшон ба Қатар сафар мекунанд.
Манбаъ афзуд, ки дар ду мусоҳибаи маҷозӣ, ки рӯзи 8 ва 14-уми апрел баргузор шуд, ҳамагӣ 54 нафар ширкат карда, бархе баъди фаҳмидани шарту шароит ва музди кор, аз суҳбат бо намояндаҳои ширкатҳои қатарӣ даст кашиданд.
Намояндаи ин ниҳод гуфт, ки музди маош барои вазифаҳои пешхидмат, қаҳваомодакун аз 495 то 535 доллар (ҳудуди 5 – 5,3 ҳазор сомонӣ), мебошад. Пули чиптаро корфармо пардохт карда, корҷӯро бо ҷойи зист ва нақлиёт барои рафтуомад ба кор таъмин мекардааст.
Қаблан, Оҷонсии бокортаъминкунӣ гуфта буд, ки шабакаи қаҳвахонаҳои “Caribou Coffee Qatar” ба 15 корманд барои омода кардани қаҳва, 10 пешхидмат (мард/зан) ва 5 коргар барои тайёркунии “сендвич” ниёз дорад.
Тибқи иттилои Вазорати меҳнату муҳоҷирати Тоҷикистон соли гузашта 500 шаҳрванди кишвар дар Қатар бо кор таъмин шудаанд. Ҳарчанд таваҷҷуҳи ширкатҳои қатарӣ ба корҷӯёни тоҷик зиёд аст, вале шаҳрвандони Тоҷикистон бештар ба хотири шарту шароит ва музди паст кор дар ин кишварро қабул намекунанд.
Бояд гуфт, ки ҳоло Русия ягона самти муҳоҷират барои шаҳрвандони Тоҷикистон ба ҳисоб меравад. Вале муҳоҷирони тоҷик дар ин кишвар пайваста зери фишор ва таъқиби мақомоти Русия қарор мегиранд ва солона ҳазорҳо муҳоҷир бидуни шарҳ аз ин кишвар ихроҷ карда мешаванд.
Ба маълумоти Вазорати меҳнату муҳоҷирати Тоҷикистон танҳо дар соли 2025 беш аз 36 ҳазор муҳоҷири тоҷик аз Русия ихроҷ ва ё бозпас фиристода шудаанд. Мақомот мегӯянд, ки теъдоди тоҷикистониёни ихроҷшуда нисбат ба соли 2024-ум кам, вале аз фурудгоҳу марзҳои ин кишвар бозпасгардонида афзудааст.
Чанд соли охир мақомоти Тоҷикистон кӯшиш доранд, самтҳои дигари муҳоҷиратро барои шаҳрвандон боз кунанд. Ин пеш аз ҳама ба Британияи Кабир, Қатар, Қувайт, Кореяи Ҷанубӣ ва Корея мебошад. Танҳо дар соли 2025 беш аз 4 ҳазору 600 корҷӯёни тоҷик ба кишварҳои авропоӣ, арабӣ ва осиёӣ ба муҳоҷирати корӣ рафтаанд.
